Shillong, K’Lyngkot 10
Ki ar ngut ki khlur ïakura ka Jylla kin pynkhreh ban leit ïashim bynta ha ka Professional Boxing ban pynlong da ka United Professional Boxing kaba hap hapoh ka jingkhmih jong ka Indian Boxing Council, ha ka Sngi Thohdieng ha Mumbai.
Kine ki kynthup ïa u Ïarapborsing Kharbani bad u Shanborlang Marbaniang.
U Ïarapborsing un ïakhun pyrshah ïa u Saurabh Kumar ha ka kyrdan ïakhun jong ka Bantamweight (8 round), katba u Shanbor un ïakynduh pyrshah ïa u Adil Kumar ha ka Super Fly Weight (8 round).
Kane ka long ka sien kaba nyngkong eh ia kine ki ar ngut ki rangïakura ka Jylla ba kin kiew rynsan ha une u snem uba thymmai bad na ka liang ka Meghalaya Professional Boxing Council (MPBC) ka la ai ka jingkitbok kitrwiang ïa kine ki ar ngut ba kin ïalehkai bha khnang ba kin lah ban khur ïa ka jingjop.
Hashwa ban kut u snem 2023, kine ki ar ngut ki rangïakura ki la lah ban khur ïa ka jingjop ha kaba u Shanbor u la lah ban pynliem da ka ‘technical knockout’ tang ha ka wat kaba nyngkong ïa u rangïakura na Arunachal Pradesh u Kumar Gurung ha ka Arunachal Pro Boxing kaba la long ha u Naiwieng ha Itanagar, katba u Ïarapborsing ula lah ban pynliem ïa u rangïakura uba na Haryana u Sahil Chouhan lyngba ka ‘technical knockout’ tang ha ka wat kaba nyngkong jong ka kyrdan ïalehkai Super Bantam Weight kaba la long ha ka 25 tarik u Nohprah jong u snem ba la lah.
Kane kan dei ka sien kaba hynñiew ïa u Shanbor ba un kiew rynsan ha ka Pro-Boxing naduh ba u la jop saw sien bad ïakhaid ar sien, katba kan dei ka sien kaba saw ïa u Ïarapborsing hadien ba u la khur jingjop ar sien bad shah rem shisien.
Haba ïakren bad u nongthoh khubor kine ki ar ngut ki rangïakura ki la pynpaw ïa ka jingkmen ban ïoh ïashim bynta biang mynta u snem bad ha kane ka kynti kin pynkhreh ban ïakhun haduh ka wat kaba phra.
“Ngi la long ba la pynkhreh bha na ka bynta kine ki jingïakhun. Lyngba ka jingïoh ka jinghikai na ki coach ka MPBC, ngi kyrmen ba ngin khur ïa ka jingjop bad ruh ban wanrah nam bad burom ïa ka Jylla hi baroh kawei,” la pynpaw kine ki ar ngut ki rangïakura.
Na ka liang u Secretary ka MPBC u Kampherki Thangkhiew u la pynpaw ba kane ka dei ka sien kaba nyngkong eh ïa kine ki ar ngut ba kin ïakhun haduh phra wat (8 round). “Ngi kyrmen ba kine ki rangïakura kin lah ban ïalehkai bha ha katei ka jingïakop namar ki la ju mlien ban ïalehkai.”
