UK, K’lyngkot:
U Myntri ka tnat iada jong ka Britain, u Grant Shapps ha ka Sngi Ba-ar u la kren pyrshah ia u President ka Russia- u Vladimir Putin ha kawei na ki jingkren ba u la pyllait paidbah lyngba ki rynsan ‘Social Media’ ha kaba u la pynrem ia ka Russia bad ong ba ka Russia ka hap ban dem khohsiew hakhmat ka North Korea ba kan ioh ia ki tiar iakhun thma ban leit hiar thma pyrshah ia ka Ukraine.
Katei ka jingpynrem jong u Shapps ia u Putin ka long hadien ba ka kaiphod ba la ioh lum da ka United States, ka pyni ba ki ‘namding bad ki bom ba la pyndonkam da ka Russia ha ka thma sha Ukraine, ki dei kiba la shna bad kiba ju pyndonkam da k North Korea. Dei hangne ba la sngewthuh ba ka Russia ka shaniah ha ka North Korea ia ki tiar iakhun thma ba kan ioh ban leit hiar thma bad ban iakhun pyrshah ia ka Ukraine.
