Guwahati, K’lyngkot:
Ka kynhun synrop jong 15 tylli ki seng ha Assam kaba kynthup ïa ka Congress kin sa ai jingkyrshan ïa ka ‘Bharat Jodo Nyay Yatra’ jong u Rahul Gandhi ka ban sdang ha ka 14 tarik, Kyllalyngkot na Manipur, la ong u President jong ka Assam Jatiya Parishad (AJP) u Lurinjyoti Gogoi. Ïa kane ka Yatra yn sa lam khmat da u heh nongïalam jong ka seng Congress u Rahul Gandhi bad yn sa sakhi ïa ka jingïashim bynta jong 14 tylli ki seng ka liang pyrshah ha Assam, ka ban sa bteng haduh ka 18 tarik, Kyllalyngkot haduh ka 25 tarik, Kyllalyngkot.
Ka United Opposition Forum Assam (UOFA), ka kynhun seng jong ki 15 tylli ki seng kynthup ïa ka Indian National Congress, ka la smai na ka bynta ban ai jingkyrshan ïa kane ka Yatra.
Ka kynhun UOFA, ka la ïatreilang bad ka kynhun synrop Indian National Developmental Inclusive Alliance (INDIA), kaba kynthup ïa kiba bun ki seng saiñ pyrthei kum ka Assam Jatiya Parishad (AJP), Raijor Dal, Communist Party of India (Marxist) (CPI(M)), Communist Party of India (CPI), Jatiya Dal-Asom, Nationalist Congress Party (NCP), Rashtriya Janata Dal (RJD), Janata Dal (United) (JD(U)), Trinamool Congress (TMC), Communist Party of India (Marxist-Leninist) (CPI(ML)), bad Aam Aadmi Party (AAP).
Ka rai na ka bynta ban ai ka jingkyrshan ïa ka ‘Bharat Jodo Nyay Yatra’ la ai ha ka jingïalang ba la pynlong bad ki nongïalam jong ki kynhun seng, kumba la pynbna da u Lurinjyoti Gogoi, uba long u President jong ka AJP.
