Imphal, K’lyngkot:
Hadien ba ka la kyntait ban ai jingbit ha kaba ïadei bad ka jingpynlong ïa ka ‘Bharat Jodo Nyay Yatra’ jong ka seng Congress na ki Palace Ground, ka sorkar Manipur hadien ka la mynjur ban ai jingbit ban pyndonkam ïa kine ki jaka ha kaba ka la buh kyndon ba la dei ban don pat tang kat ban biang ki nongïashim bynta.
Ka sorkar Manipur hashwa kane, ka la kyntait ban ai jingbit ïa ka sorkar Congress ba kan pynlong ïa ka jingïalang paidbah ha Imphal East na ka bynta ban sdang ïa ka Bharat Jodo Nyay Yatra ba la lamkhmat da u nongïalam jong ka seng Congress u Rahul Gandhi.
Ha kaba ïadei bad kane ka bynta, wat lada la kyntait ban ai ïa ka jaka ha Hatta Kangjeibung, ka seng Congress ka la thmu ban sdang ïa ka Yatra na Manipur la ka long kumno kumno ruh kata ha ka 14 tarik, Kyllalyngkot.
Ha ka jingïakren bad ki nongthoh khubor, hadien ka jingïakynduh bad u Myntri Rangbah u N Biren Singh, u President jong ka Manipur Pradesh Congress Committee u K Meghachandra Singh u la pynpaw ïa ka jingsngewsih.
U la ong ba ka jingkyntait ban ai ka jaka ban pynlong ïa ka jingïalang paidbah ka long ka jingpynïap ïa ka synshar paidbah bad ka jingñion beiñ ïa ka hok jong ki paidbah.
Ha kaba ïadei bad kane, u nongïalam jong ka seng Congress u la ong ba ïa ka Yatra la thmu ban pynlong ha ka jaka jong ki riewshimet ha Khongjom kaba don ha Thoubal distrik.
U Meghachandra u la ong shuh shuh ba ka Yatra kam dei ka prokram jong ka kam saiñ pyrthei bad ka dei ka prokram na ka bynta ki paidbah.
Ïa ka Bharat Jodo Nyay Yatra, la thmu ban sdang na Manipur ha ka sngi U Blei, ha kaba kan sa ïaid ha ka jingjngai kaba 6,713 kilometres ha kylleng ki jaka jong ki 110 tylli ki distrik ha ki 12 tylli ki jylla hashwa ban long ka ilekshon Lok Sabha 2024.
Kane ka jingïaid paidbah kan sa shim por da kumba 66 sngi ha kaba kan sa long da ki bos bad da ka kjat, bad yn sa pynkut ïa ka ha Mumbai.
Ha kaba ïadei bad ka rai jong ka sorkar jylla kaba mynta, na ka liang ka seng Congress kam pat ai rai ha kaba ïadei bad ka jingsdang ïa ka Yatra na kine ki jaka, namar ba ka sorkar jylla ka la rai ban ai jingbit ïa ka ban pynlong ïa ka jingïalang tang kat ban biang ki nongleit ïashim bynta.
