Ranchi, K’lyngkot:
Kum shi bynta ban pynibor pyrshah ïa ka sorkar kmie ha ka por ba u Myntri Rangbah ka Jharkhand u Hemant Soren u la pep ban leit mih ha ka sien kaba hynñiew halor ka jingshah khot hajir ha ka kynhun Enforcement Directorate, ka sorkar jylla ka la bthah ïa baroh ki tnat ka sorkar ba kim dei ban jubab ei ei lada ki shah buh jingkylli ha ki kynhun tohkit jong ka sorkar kmie ne ban ai beit beit ïa ki kot donkam sha ki.
Kine ki tnat ki la dei ban pyntip halor baroh ki jingkylli sha ka Cabinet Secretariat ne sha ka Vigilance Department na ka bynta ka jingpyntreikam.
Kiba bun na ki dkhot jong ka kynhun synrop ka liang pyrshah ka INDIA, kynthup ka Myntri Rang-bah jong ka West Bengal ka Mamata Banerjee ha kaba ka kynhun Enforcement Directorate ka la shah thombor ha ka 5 tarik, Kyllalyngkot, ki la kynthoh jur ïa ka sorkar BJP kaba la bat ïa ka jingsynshar ha ka sorkar kmie da kaba ki la kynnoh ba ka la pyndonkam bakla ïa ki kynhun tohkit jong ka sorkar kmie khamtam ha kum kane ka por ban pynlong ïa ka ilekshon Lok Sabha.
Ha ka shithi ba la phah sha baroh ki tnat sorkar, ha ka sngi Ba-ar, ka Principal Secretary sha u Myntri Rangbah ka Vandana Dadel ka la ong ba ki heh sorkar kim dei ban ai jubab ei ei ha kaba ïadei bad ki jingshah kylli jingkylli bad ban ym ai ïa ki kot ki sla ha kaba ïadei bad ka jingshah tohkit ha ki kynhun tohkit bad ba ki la dei ban pyntip sha ka Cabinet Secretariat bad Vigilance Department lada ki ïoh shithi ei ei ban shah tohkit ha ki kynhun tohkit.
