Guwahati, Kyllalyngkot:
U Director General of Police, jong ka Assam u G P Singh, u la pynmih ïa ki hukum ha kaba ïadei bad ka jingnang bun jong ki jingjia kiba buh jingeh na ki kam pyntriem jong ki lehnoh.
Ha kaba ïadei bad kane ka bynta, na ka liang u Singh u la kyntu ïa ki samla ba ki la dei ban sngewthuh bad maham ba kin shah pynïap lada jia ba ki rung dkhot ha ka kynhun lehnoh.
Nalor kane u la bthah ïa kito kiba sah ha ki ktem jong ki lehnoh ba ki la dei ban pyndem ïalade khnang ba kin lait im bad ba kin phai noh sha ki jaka ba don jingshngaiñ bad sha ka jingim kaba bha.
Ha kaba ïadei bad ka jingjia kaba dang shen, ka kynhun lehnoh United Liberation Front of Asom-Independent (ULFA-I), ka la pynshisha da kaba ong ba ki jingwan leh donbor lyngba ka Drone ka la jia ha ka ktem jong ka kaba don ha Myanmar ha kaba la leh ïa kane da ki shipai ka tnat Indian Army.
Kumba la ïathuh ka tyllong khubor, la ong ba ki Drone ki ju shah phah na ka bynta ban leh ïa ki kam thombor ne leh donbor na Arunachal Pradesh.
Ka la don kawei ka ktem jong ka United Liberation Front of Assam-Independent (ULFA-I) ha Myanmar kaba la shah pynibor da ka jingpyntreikam da ki Drone.
Ïa kane la pynshisha da ka kynhun ULFA-I ha ka jingthoh ba la phah ha ka lah sngi U Blei hadien ba la jia ka jingjia.
Kane ka ktem, ka la long kawei na kiba bun ki jaka treikam na ka bynta ban leh ïa ki kam ban pynjam sha shiliang khappud sha India, ban ai jaka sah bad jinghikai ïa kiba shah pynrung dkhot.
Ki la don baroh kumba lai tylli ki Drone ba la shah phah na ka bynta ban leh ïa ki kam thombor.
Ka Drone kaba nyngkong ka la pynibor pyrshah ha ka por 4:10 mynstep, kaba ar ha ka por 4:12 mynstep bad kaba lai ha ka por 4:20 mynstep jong katei ka sngi.
Kane ka kynhun pyntriem ka la ong ba la don lai tylli ki bom ba la pynhap, ha kaba ka jingbthei jong ki ar tylli ka la pynmynsaw ïa ki dkhot ka seng bad uba lai um shym la bthei.
