Shillong, K’Lyngkot 11
Ka Mawkhar SC ka la ïasam mar shi point ha ka jingïakhun pyrshah ïa ka Lawsohtun SC ha ka lympung ïalehkai First Division Football League 2023-24 hadien ba ki la ïakhaid mar 2-2 kol ha ka sngi Palei ha SSA Stadium, Polo.
Ha kane ka jingïakhun ka Mawkhar ka la ïoh ban pynkhih jar tang mar ïasdang ka jingïalehkai lyngba u Levarsharp Syiemlieh ha ka minit kaba 3 bad ïa ka kol kaba ar la thep da u Pynshailang Dkhar ha ka minit kaba 5. Watla ka Lawsohtun ka la shah thep haduh ar kol, hynrei kam shym la lah ban pynphai haduh kaba kut jong ka kylla step.
Hynrei ka Lawsohtun ka la ïakhun tyngeh ha ka kylla miet bad hashwa ban kut ka jingïalehkai ka la lah ban pynphai kylla lyngba u Peter Lyngdoh ha ka minit kaba 82 bad ïa kawei pat la thep da u Debaspar Rani ha ka minit kaba 98 na ka bynta ban ïakhaid mar ar kol.
Na ka liang ka SSA ka la pynbna ba ka lympung ïalehkai Under-16 Boys Football League 2023-24 kan bteng biang ha ka sngi Thohdieng ha kaba ka Umpling SC kan ïakhun pyrshah ïa ka Mawlai SC (9:30AM), kumjuh ha ka por 11 baje ka Mawpat SC kan ïakynduh pyrshah ïa ka Merinda FC. Ka Ïaitylli SC ïa ka Shillong Soccer Scout (12:30PM) bad ka Mawreng SC kan ïakynduh pyrshah ïa ka Rangdajied United FC (2PM).
