Shillong, K’Lyngkot 11
Lai ngut ki nongrah nar ka Jylla ki la khur ïa ki takma rnong ha ka jingïakob rahnar ba la tip kum ka North East Powerlifting Competition 2024 hapoh ka jingpynbit jingpynbiang ka Powerlifting India kaba la long ha Silchar naduh ka 5 tarik haduh ha ka 7 tarik mynta u bnai.
Kine lai ngut nongrahnar kiba la wanrah nam bad burom ïa ka Jylla ki kynthup ïa u Samla Jerry Lyngdoh uba la ïashim bynta ha ka jingkhia ba 74kg Open, u Samla Lastbert Sangma ha ka jingkhia ba 59kg Open bad ka Mary Syiemlieh ha ka jingkhia ba 52 kg Open.
Ha kane ka jingïakob rahnar la wan shim bynta da ki nongïalehkai na kylleng ki jylla ka thaiñ shatei lammihngi.
Na ka liang ka Meghalaya Powerlifting and Fitness Association lyngba u Bah Frankie Nongrum u la pynpaw ka jingsngewsarong halor kane ka jingjop jong kine ki nongrahnar, kaba long ruh kum shi bynta jong ka jing-ai mynsiem ïa kiwei ‘rang bad thei ïalehkai ka Jylla ba kin long kiba trei shitom.
“Watla ngim pat da don eh ki tiar ïalehkai kiba biang bad ki jingai jinghikai ba biang, pynban ka jingjop ka pynpaw ïa u soh jong ka jingtrei shitom jong ki.”
