Kolkata, Kyllalyngkot:
Ka Myntri Rangbah jong ka West Bengal bad kaba dei ka khlieh nongïalam jong ka seng Trinamool Congress ka Mamata Banerjee ha ka sngi Balang ka la thalaiñ da kaba tyngeh ïa ki dkhot jong ka seng kiba la wanrah ïa ki kynrum kynram hapoh ka seng naba ki la buh ka jingïapher jingmut hapdeng ki nongïalam barim bad kiba thymmai.
Kum shi bynta ban sdang ïa ka jingpyntreikam jong ka bad shi bynta ban pynkhreh bha na ka bynta ka jingïakhun ïa ka ilekshon Lok Sabha, ka Mamata ha ka sngi Balang ka la pynlong ïa ka jingïalang bad ki MLA bad ki nongïalam na Paschim Midnapore distrik ha ka jaka sah jong ka kaba don ha ka bynta ba shaphang Shathie jong ka Kolkata.
Kum shi bynta ban pynpaw ka jingbitar ha kaba ïadei bad ki jingkren ba la pynpaw paidbah da ki nongïalam jong ka seng, ka Mamata ka la bthah ïa u National General Secretary jong ka seng u Abhishek Banerjee bad u President jong ka seng ha ka jylla u Subrata Bakshi ba ki la dei ban pynkhreh ha ka ban buh ïa ka thup kyrteng jong ki nongaikten, ki ban long tang ma ki hi ki briew na ka kynhun ki ban pynshai halor kiei kiei baroh sha ki lad pathai khubor.
Ka Mamata, kaba la shah leh kiar ha u Abhishek, u Bakshi ha kawei pat ka liang bad u MP u Dev ha kawei pat ka liang, ka la pynmih ka jingmaham sha baroh ki nongïalam kiba dei kiba rim bad kiba thymmai hapoh ka seng ha kaba ïadei bad ka jingpynbna paidbah ïa ki jingkren ne jingkynthoh jong ki ha kaba ïadei bad ki kam jong ka seng.
