Ka jylla ka la nang pynkhreh na ka bynta ka jingwan jong ka President ka Ri India ha ka 15 bad 16 tarik Kyllalyngkot. Ha ka banyngkong, ka President kan leit shwa sha Tura ban plie ïa ka lympung Meghalaya Games bad hadien kata, kan wan sa sha Shillong bad kan leit jngoh ruh ïa ka ‘Law Kyntang ha Mawphlang. Ngi sngewkmen ba ka khlieh duh jong ka Ri kan wan sha ka jylla jong ngi bad kane ka dei ka sien banyngkong ba kan wan hadien ba ka la shah jied kum ka President. Ngi sngewkmen ruh ba ka dei ka ‘riewlum kum ma ngi kaba la shah jied ban shong ha ka shuki bahalorduh jong ka Ri India. Ngi dei ban pdiang sngewbha haba ka wan.
Hynrei kaba ngi khohñioh ka long pat ka jingpynsyrtok ïa ki paidbah. Kane kam dei ka sien banyngkong lane bakhatduh ba ki heh ki haiñ kin wan sha Meghalaya. Ha man ba wan ma ki, ma ngi ki paidbah ngi hap ban mad jingeh na ka jingpyrkhing ha ka jingïaid ki kali. Namar ka jingbuh hakhmat ïa ka jinglong shngaiñ jong kine ki kynrem ki lyndan, ki pulit ki hap ban pynjari da ki jingpyrkhing kiba bun jait haduh ban da mih syep sa ki paidbah kiba hap ban shong ha surok khlem khih shano-shano. Kane kam dei kaba jia tang hangne, hynrei ha ka Ri baroh kawei haba leit jngoh ka President ne Myntri Rangbahduh. Ngi sngewthuh ba ka long kaba donkam ban pynthikna ïa ka jingshngaiñ ka jong ki, hynrei ha kajuh ka por, hap ruh ban pyrkhat lem na ka bynta ki paidbah kiba donkam ban leit sha kiba bun ki jaka.
Ngi sngewdei ban ai jingmut ïa kine ki heh ki haiñ ba kin pyndonkam beit da ka ‘Helicopter’ haba ki wan ban ïashim bynta ha ki jingïalang. Kum ka nuksa, ka President ka lah ban leit da ka ‘Helicopter’ na Upper Shillong sha Mawphlang khlem da donkam ban pynwit ïa ki nongleit nongwan ha surok. Ka sorkar jylla ka dei ruh ban nang ban buh ïa ki jaka ban pynlong ïa ki jingïalang da kaba jied da ki jaka ba ki ‘Helicopter’ ki lah ban hiar bad kiew. Ka nuksa ka long kum ha madan Polo. Ki heh ki haiñ ki lah ban wan her na Upper Shillong ne Umroi da ka ‘Helicopter’, kin hiar ha madan Polo, ïashim bynta ha ka jingïalang bad ynda la kut kata, sa kiew biang da ka ‘Helicopter’ ban leit sha Upper Shillong ne Umroi bad nangto, sa sha kad liengsuiñ ha Guwahati. Hynrei lada pynlong jingïalang ha ki jaka ba ka ‘Helicopter’ kam don jaka ban hiar ne kiew, ma ngi ki paidbah ngin hap ban mad ïa ki jingeh.
Kam long kaba donkam ïa kine ki heh ki haiñ ba kin da wan ïaid napdeng sor lane na ki jaka ba khapngiah. Ki dei ki briew kiba bunkam bad kim don por than ban pynlut ha kawei ka jaka. Namarkata, hap ban pynwan dur bha ïa ki jingïalang haba ki wan ki kynrem ki lyndan. Ki bor pahara ruh ki dei ban sngewthuh ba ki paidbah kim don por ban ïeng ha surok da ki kynta. Kane ka dei ka pyrthei hiran bad ngi hap ban ïa beh sha ki kam ki jam kiba bun jait. Kam mut ba tang ba wan ki kynrem ki lyndan, ma ngi ki paidbah ngi hap ban mad jingeh. Kata ka long ka bym shong hok bad bym shong nongrim. Ki don ki lad, kumba la kdew haneng, ban pyllait ïa ngi ki paidbah na ka jingsyrtok ha surok. Tangba imat ka sorkar jylla ka kwah ban pyni ïa ka sor Shillong sha kine ki heh ki haiñ da kaba pynïaid ïa ki na surok.
Ha kane ka juk stad mynta lei, ym da donkam ïa ki heh ki haiñ ba kin da wan da ka met. Ki lah ban shu shong na nongbah New Delhi ban plie bad ai jingkren ha ki jingïalang ba bun jait. Ha kane ka dur, baroh ki lait ban ïa bunkam bad na ka jingsyrtok. Ngi ïohi ba ha kiba bun ki jingïalang, u Myntri Rangbahduh u shu ai jingkren lyngba ki kor ki bor na New Delhi khlem da donkam ban leit sha kito ki jaka. Ngi kyntu ba dei ban shim da kane ka lad na ka bynta baroh khnang ba ki paidbah kin lait na ka jinglynga pisa bad ban ïada ruh na ka jingpynlut ksan ïa ka pisa paidbah.
