Shillong, K’Lyngkot 11
Ka lympung ïalehkai 5th Meghalaya Games 2024 ka la sdang da ka jingïalehkai phutbol ki khynnah shynrang U-18 ha ka sngi Palei ha madan Govt Boy’s Higher School, Chandmari, Tura.
Ha kane ka sngi sdang ka South West Khasi Hills ka la khur ïa ka jingjop hadien ba ka la lah ban pynliem noh ïa ka South Garo Hills da 6-1 kol. U Donkupar Lyngkhoi u la khur ïa ka hat-trick namar u la thep haduh saw kol marwei, katba ïa ki shi kol la thep da u Lumjingtip Wanñiang bad u Lidan Hashah.
Ha kane ka sngi sdang la ïadon lang u Working President ka Meghalaya State Olympic Association (MSOA) Bah John F Kharsiing ha kaba u la ai khublei kitbok ïa ki rangïalehkai ba kin ïalehkai bha ha kane ka lympung khnang ba ki lah ban kynjoh sha ka thong.
Haba phai sha ka jingïalehkai, ha ka kylla step ka South West Khasi Hillls ka la ïoh ban thep ar kol, katba ka South Garo Hills District ka la pynphai kylla shi kol.
Hynrei ha ka kylla miet ka South West Khasi Hills ka la ïoh ban thep haduh saw kol, katba ka South Garo Hills kam shym la lah shuh ban pynphai bad mad ïa ka jingshah rem.
Ïa kane ka Meghalaya Games yn plie da ka President jong ka ri, ka Droupadi Murmu ha ka lah sngi U Blei ha Tura hashwa ban bteng ïa kiwei pat ki jingïalehkai ki ban kut haduh ka 20 tarik mynta u bnai.
