Jowai, K’Lyngkot 11
Ka dongmusa jong ka 5th Meghalaya Games 2024, ka la wanpoi ha nongbah Jowai ha ka sngi Palei ha kaba la sakhi lang da u MLA ka Jowai u Bah Wailadmiki Shylla, u Deputy Commissioner ka West Jaiñtia u Bah B.S Sohliya nalor kiwei kiwei.
Kane ka lympung ïalehkai ba heh ka Jylla kan sdang naduh ka 15 tarik haduh 20 tarik mynta u bnai ha nongbah Tura, West Garo Hills District ha kaba yn sa plie paidbah da ka President ka ri India ka Droupadi Murmu ka ban long kum ka kongsan.
Ïa kane ka dongmusa la wanrah na Shillong da u khlur nongmareh ba pawnam ka Jylla Bah Bining -star Lyngkhoi bad la aiti ha u rangïalehkai phutbol barim ka Jylla u Mar-langki Suting ha shnong Ummulong, West Jaiñtia Hills District ban rah sha Mihmyntdu Lad College da ka kali ba don ka dur jong ka tikhor ka 5th Meghalaya Games 2024′.
Na Lad College sha Mooralong la rah da u Deilang wa-O Nongpluh uba long u rangïalehkai Badminton, na Mooralong shaduh Ïawthymme la rah da u Honda-O-Hi Papang u rangïalehkai Teakwondo, na Ïawthyme shaduh V-Mart, Ladthalaboh da u Ferdinand Suchiang u rangïalehkai Wushu, na Newhill la rah da u Wankishwa Mawlong u rangïalehkai Judo, na Newhill shaduh Marian Hill la rah da ka Happiness Phawa bad na Marian Hill shaduh Stant Ummulong la rah pat da u nongmareh u Marso Kyndait.
Hashwa ba u kongsan un aiti ïa ka dongmusa ha u Bah Beningstar ban pynpoi sha nongbah Tura, ka la don ka jingïalang lyngkot ha kaba u MLA ka Jowai u Bah Wailadmiki Shylla ula kren aimynsiem bad kitbok kitrwiang ïa baroh ki khynnah bad samla ki ban ïashim bynta ha katei ka lympung ïalehkai baheh ka Jylla.
Nalor u kongsan la don lang ruh u Superintendent of Police ka West Jaiñtia Hills District u Bah Chemphang Syrti, u District Sports Officer ka West Jaiñtia u Bah Khroo -bok Passah, ka District Sports Officer jong ka Eastern West Khasi Hills District Kong Balarina Syiem, ka District Sports Officer ka East Jaiñtia Hills District Kong Ste-phanie. M. Rapsang, ki dkhot ka WJDSA nalor kiwei kiwei.
Baroh ki khynnah bad samla ka District ki ban ïashim bynta ha ka Meghalaya Games ki don 200 tam ngut kynthup kynthei bad shynrang ha ki kyrdan ïalehkai bapher bapher kynthup ruh ki jingïalehkai tynrai jong ki longshwa (Traditional Game) ka Rah Moo-khrah, Mawpoiñ bad ka Wa·pong Sika.
Ïa ka jingïalang kitbok kitrwiang la pynïaid da ka Kong Daiarisa Lyngdoh bad la ïoh ka jingkren pdiang na u Bah Patrick Lamre, Vice President WJDSA bad kyntien aikhublei na u Bah Khroobok Passah DSO, West Jaiñtia Hills District.
Hadien ka jingïalang u Bah Wailadmiki Shylla ula aiti ïa ka dongmusa ha Bah Beningstar Lyngkhoi.
