Chandigarh, K’lyngkot:
U General Secretary jong ka All India Congress Committee u KC Venugopal u la pyllait ïa ka thup kyrteng ha ki konstitwensi jong ki Coordinator na ka bynta baroh ki Parliamentary konstitwensi kiba don ha kylleng ka ri.
U Inderbir Singh Bolaria u la shah thung kum u Parliament Coordinator na ka bynta ka Gurdaspur Lok Sabha konstitwensi, u Sukhpal Singh Bhullar na ka bynta ka Amritsar, u Pargat Singh na ka bynta ka Khadoor Sahib, u Sukhbinder Sarkaria na ka bynta ka Jalandhar, ka Ashwani Sharma na ka bynta ka Hoshiarpur, u Pawan Adia na ka bynta ka Anandpur Sahib, Dr Raj Kumar Chabbewal na ka bynta ka Ludhiana, u Harinder Pal Singh Harry Mann na ka bynta ka Fatehgarh Sahib, u Krishan Kumar Aggarwal na ka bynta ka Faridkot, u Sukhwinder Singh Danny na ka bynta ka Ferozepur, u Hardyal Singh Kamboj na ka bynta ka Bathinda, u Randeep Singh Nabha na ka bynta ka Sangrur, bad u Gurkirat Singh na ka bynta ka Patiala.
Ki heh nongïalam jong ka seng Congress ki la pynbna ïa ki kyrteng jong ki Coordinators shi sngi shwa ba ki san ngut ki dkhot jong ka National Alliance Committee ki la dei ban pynlong ïa ka jingïakren bad ki heh nongïalam ha ka ri jong ka seng AAP ha ka nongbah Delhi ha kaba ïadei bad ka jingïasam ïa ki konstitwensi ha Delhi bad Punjab. Baroh ar, kata ka seng Congress bad ka seng AAP ki la long ki seng ba la ïatreilang hapoh ka kynhun synrop Indian National Developmental Inclusive Alliance (INDIA).
Ha kaba ïadei bad kane, kiba bun na ki nongïalam jong kine ki seng ha kiba bun ki jylla, khamtam ka seng Congress, ki la kyntait ban ïasam ïa ki konstitwensi ha ka jylla, ha kaba la pynbna ba kan sa ïakhun ha baroh 13 tylli ki Parliamentary konstitwensi.
“Ka kynhun ki nongïalam ha ka jylla ki la ai ka jingpynshai halor kane sha ki heh nongïalam jong ka seng Congress. Ka jingïakren ha kaba ïadei bad ka jingïatreilang bad kiwei pat ki seng ha ka ri ka la long ka bynta ban khmih bniah da ki heh nongïalam jong ka seng ha ka ri. Ngin sa pdiang ïa ka rai ba ki ai,”la ong uwei na ki nongïalam jong ka seng Congress.
