Shillong, K’Lyngkot 11
U Dorival Junior u la shah thung kum u coach bathymmai ka Brazil, la pynbna ka Brazilian Foot-ball Confederation (CBF).
Une u coach ba la 61 snem ka rta u la pynthikna halor kane ka rai ha ka sngi U Blei ba un mih noh na ka Sao Paulo bad ban shimti noh ïa ka Brazil hadien ba ka CBF ka la weng noh ïa u coach ba shipor u Fernando Diniz ha ka sngi Thohdieng.
“U Dorival Junior un long u coach bathymmai na ka bynta ka kynhun ïalehkai jong ka Brazil bad yn pynbna paidbah ha Rio de Janeiro,” la ong ka kyrwoh lyngba ka CBF.
U Dorival un shimti ïa katei ka kynhun kaba la rah ïa ka nam lahduh haduh san sien, hadien ba ka jingïaid lynti ka Brazil ka la poi sha kaba kut ha ka World Cup 2022 hadien ba ka la shah rem noh ha ka Croatia lyngba ka tie-breaker, ha kaba ka la pynlong ïa u Tite un shah weng noh kum u coach katei ka kynhun.
Ïa ka Brazil la pynïaid da u coach ka kynhun ïalehkai Under-20 u Ramon Menezes hashwa ban thung shipor ïa u Diniz ha u snem ba la lah. U Diniz u la shah weng noh ha ka sngi Thohdieng, shisngi hadien ba u Ednaldo Rodrigues un shah pynkhamti biang ha ka CBF hadien ba u la shah pynkut noh ha u Nohprah ha ka ïingbishar jong ka Rio de Janeiro.
Kumba ka paw u Dorival u la lah ban pynurlong ïa ka Flamengo ban rah ïa ka nam lahduh ha ka Copa Libertadores bad ruh ïa ka Brazilian Cup ha u 2022 hashwa ba un leit ïasoh sha ka Sao Paulo. U la shimti ruh kum u coach ia ka Atletico Mineiro, Athletico Paranaense, Internacional, Vasco da Gama, Fluminense bad ka Palmeiras.
Kumba ka long mynta ka Brazil ka la don ha ka kyrdan ba hynriew ha ka lympung ïaknieh rung World Cup napdeng ki kynhun kiba na South America hadien ba ka la jop tang ar sien na ki hynriew sien ïakhun bad shah rem lai sien.
