New York, K’lyngkot:
Ka nongmihkhmat jong ka India sha United Nations, ka Ruchira Kamboj, ha ka Sngi Palei ka la pynrem jur halor ka jingpyniap dusmon jong ka Israel ia ki paid nongshong shnong ba lui-lui jong ka Gaza. Nalor nangta ka la ong ba ka jingshim naphang ia ki mynsiem briew ha Gaza ka long ka bym lah pdiang bad ka jing-leit hiar thma ba khlem sangeh jong ka Israel pyrshah ia ka Gaza ka la pynhiar palat shah ia ka jinglong jingman hapoh Gaza nalor kiwei ki jingeh ba katei ka nongbah ka dang iakhun bad ioh mad.
Namarkata, ka Kamboj ka la ong ba ka jingleit hiar thma jong ka Israel ia ka Gaza ka la long palat pud bad kam shym pyrkhat shuh ia ki mynsiem briew kiba don ha katei ka nongbah wat la kim shym don jingiadei bad ki lehnoh Hamas hynrei ki long tang ki paidbah kiba shah synshar ha katei ka kynhun lehnoh (Hamas) jong ka Palestine.
Kumta ruh ka Kamboj ka la ong ba kane ka jingleit hiar thma jong ka Israel ka long ka bym lah ban pdiang bad ka Israel ka dei ban wad ia ki lad- ki lynti kumno ban sangeh noh ia ka thma bad ba kan ym don jingktah shuh ia ki paidbah nongshong shnong ba lui-lui jong ka Gaza namar ka jingleit hiar thma jong ka Israel ia ki lehnoh Hamas hapoh Gaza ka la pynshitom beiñ ia ki nongshong shnong ka Gaza.
