Aizawl, K’lyngkot:
Ki shipai ka tnat Assam Rifles (Mihngi) ki la ïoh ban kurup ïa 225 gms u Heroin No. 4 uba la kot sha ka T. 17,500,000 ha ka thaiñ Bualpui, kaba don ha Siaha distrik bad la ïoh ruh ban kem ïa arngut ki briew bad kumjuh ki la ïoh ruh ban kurup ïa 20 tylli ki song ki kuli Methamphetamine kiba don ïa ka jingkhia kaba 22.220 kilo ba la kot sha ka T. 66,66,00,000 ha ka thaiñ Zokhawthar-Melbuk Road ha ka 11 tarik, Kyllalyngkot, kaba don ha Champhai distrik, Mizoram, bad ha kane ka jingjia uwei u briew u la shahkem.
Ka kynhun shipai jong ka tnat Assam Rifles ka la pynlong ïa kane jingleit khynra hadien ba ïoh jingtip shaphang ka jingdon jong kine ki nongkhaïi drok ha kitei jaka.
Ïa kine ki jingdih pynbuaid ba la ïoh ban kurup la aiti noh sha ki tnat Excise and Narcotics kiba don ha Siaha bad Champhai, na ka bynta ban leh ïa kaba donkam.
Hashwa kane, kata ha ka 10 tarik, Kyllalyngkot, ki shipai Assam Rifles, ki pulit bad ki pulit jong ka kynhun Custom Preventive Force ha ar tylli ki jaka ki la ïoh ban kurup ïa 139 grams u Heroin uba la kot sha ka T. 97.30 lak bad 20 song u Cigarette bar ri uba la kot sha ka T. 26 lak ha Champhai distrik ha ka 8 tarik, Kyllalyngkot.
Hadien ba la ïoh jingtip, ka kynhun ba la ïatreilang hapdeng ka Assam Rifles, ka Zokhawthar, bad ka Champhai bad ka Customs Preventive Force ki la pynlong ïa ka jingleit khynra.
Ïa kine ki song jong u Heroin No. 4 bad u Cigarette uba la kot sha ka T. 1,23,30,000 la ïoh ban kurup ha ka jingpyntreikam.
Ka jingleit khynra ka dang bteng ha ka thaiñ jong ka Crossing Point I, Zokhawthar bad Jail Veng, Champhai bad la kurup noh ruh ïa kine ki mar ba la khaïi beaiñ.
Ka jingshah tohkit jong kine kiba la shahkem ka dang ïai bteng khnang ban lap dien shuh shuh halor ki kam beaiñ.
