Shillong, K’Lyngkot 12
Ka Laitkor CC bad ka Sales XI ki la khur ïa ka jingjop ha ka 3rd Division Shillong Cricket League 2024 ba la pynïaid da ka Shillong Cricket Association (SCA) ha ka sngi Thohdieng ha madan Urkaliar.
Ha ka jingïakhun kaba nyngkong, ka Laitkor ka la pynliem noh ïa ka LMYA da 2 wiket. Ka Laitkor kaba la jop ïa ka kynting pisa, ka la ailad shwa ïa ka LMYA ba kan tied nyngkong ha kaba ka la kamai 133 run bad shah pynhap 9 wiket ha ki 20 over. U Sagar Sharma u la khyrwit ïa ka shiteng spah (52 run na ki 44 bol) bad u Saurab Deb u la ïoh 29 run na ki 21 bol. Katba u Osric Herberth Wanswett bad u Aleric Wanswet ki la khur mar 3 wiket na ka bynta ka Laitkor.
Haba wan shimti ïa ka pali kaba ar, ka Laitkor ka la lah ban kynjoh sha ka thong da kaba ïoh 136 run bad shah pynhap 8 wiket ha ki 18.3 over. U Ronnie Khongsar u la tied 41 run na ki 35 bol bad u Scrivener Mawrie u la ïoh 35 run na ki 17 bol. Katba u Arun Karthik u la khur 3 wiket bad ïa ki 2 wiket la khur da u Sagar Sharma. Ïa ka nam Player of the Match la khur da u Osric Herbert Wanswett.
Haba phai sha kawei pat ka jingïakhun kaba ar, ka Sales XI ka la jop da 8 wiket ïa ka United Brothers.
Ha ka jingïakhun ka United Brothers ka la shimti ban tied nyngkong ha kaba ka la kamai 124 run bad shah pynhap 6 wiket ha ki 20 over. U Mojidul Khan u la tied 35 run na ki 29 bol bad u Akash Chettri u la ïoh 29 run na ki 49 bol. Katba u Arup Deka bad u Amit Paul ki la ïoh mar 1 wiket na ka bynta ka Sales XI.
Haba wan beh ïa ka thong, ka Sales XI ka la kynjoh sha ka thong ha kaba ka la kamai 126 run bad shah pynhap 2 wiket ha ki 10.4 over. U Sahabuddin Ali u la khyrwit ïa ka shiteng spah kaba 50 run na ki 25 bol bad u Tanay Chakrabarty u la ioh 30 run na ki 17 bol. Katba u Bablu Prasad bad u Bishal Mahato ki la khur mar 1 wiket na ka bynta ka United Brothers. Ïa ka nam Player of the Match la khur da u Sahabuddin Ali.
