Lebanon, K’lyngkot:
Ka kynhun lehnoh Hezbollah ha kane ka kynti, ka la pyntip ba ka Israel ha ka Sngi Nyngkong ka la shim ia ka jingim jong u nong-ialam ba hakhlieh jong katei ka kynhun kaba long ka kynhun lehnoh ba la ioh jingkyrshan na ka Iran.
Kane ka long ka sien ba nyngkong hadien lai bnai ba katei ka kynhun lehnoh ka la sdang pynthut ia ka thma hapdeng ka Israel bad ki lehnoh Hamas, ha kaba ka Hezbollah ka la dawa ruh ia ka Israel ba ka dei ban sangeh noh shi syndon ia katei ka thma kaba la bam duh ia shibun bah ki mynsiem briew ba lui-lui hapoh Gaza.
La ong ba u Wissam Hassan Tawil u la kyllon iap ha ka surok hapoh Jerusalem hapdeng ka jingther bom jong ka Israel sha katei ka jaka ha katei ka sngi.
Kumta, ka Hezbollah ka la iathuh ba u Tawil u long u nongialam ba hakhlieh jong katei ka kynhun lehnoh bad uba ju lam khmat ha kiba bun tylli ki kam ba kongsan jong katei ka kynhun ha ki thaiñ khappud.
Kumjuh ruh na ka liang ka tnat shipai jong ka Israel, ha ka Sngi Nyngkong ka la pynbna ba ka la ioh ban ther bom sha ki jaka ba don ki ktem jong ki lehnoh Hezbollah hapoh Lebanon hynrei kam shym la pynbna eiei shaphang ka jingïap jong u Tawil ha katei ka jingjia.
Namar la ong ba u Tawil u long u nongialam ba hakhlieh eh jong katei ka kynhun uba la iap kloi noh ha kane ka por wat hadien bun tylli ki jingjia bad ki jingiakhun pyrshah bad ki shipai ka Israel kaba la sdang jia naduh ba ka Hamas ka la leit ban hiar thma pyrshah ia ka Israel ha ka 7 tarik u Risaw jong une u snem 2023 ba la leit.
