New Delhi, K’lyngkot:
Ka kynhun National Investigation Agency (NIA) ha ka sngi Palei ka la pynlong ïa ka jingleit khynra sha 32 tylli ki jaka kiba don ha Delhi, Haryana, bad Punjab pyrshah ïa ka seng Babbar Khalsa International (BKI), ka kynhun Lawrence Bishnoi Gang, bad kiwei pat ha kaba ïadei bad ki kam pyntriem jong ki lehnoh kiba la jia ha ka ri.
Katkum ka jingthoh ba la phah da ka kynhun NIA, kiba bun na ki tiar siat bad ki kuli ïasiat, ha ryngkat ki kot ki sla kiba long beaiñ, ki Digital Device bad ka pisa la ïoh ban kurup.
“Ki tiar ba la ïoh ban kurup ki kynthup ïa ar tylli ki pistol, ar tylli ki Magazine, bad ki kuli ïasiat, ha ryngkat ka pisa kaba la kot sha ka T. 4.60 lak, nalor kine ki kynthup ruh ïa ki kot kiba long beaiñ bad ki Digital Device,” la ong ka kynhun NIA. Ka Jhajjar bad ka Sonipat ha Haryana ki la long kiwei pat ki jaka ïa kiba la shah khynra ha ka kynhun tohkit.
Ki kynhun tohkti ki la pynlong ka jingthwet ha ki jaka sah jong ki dkhot ba don ka jingïadei bad ka kynhun runar jong u Lawrence Bishnoi kaba pyntreikam ruh ïa ka kynhun lehnoh ban leh ïa ki kam pyntriem. Ïa ka jingleit khynra la pynlong khyndiat sngi hadien ba ka kynhun NIA ha ka 6 tarik, Kyllalyngkot ka la kurup ïa saw tylli ki jingdon jingem ba la long trai da u Lawrence Bishnoi.
Kane ka kynhun tohkit ka la ong ba ïa kane ka jingleit khynra la pynlong ha kaba ïadei bad lai tylli ki mukotduma kiba don ka jingïadei bad ka jingdon jong ka jingïasuhbuit sniew bad ki kam ba la leh da ka kynhun kaba la shah ñiew beaiñ ha ka sorkar ka Babbar Khalsa International bad ka kynhun pyntriem jong u Lawrence Bishnoi, napdeng kiwei pat. Na kine ki jingdon jingem, lai tylli ki dei ki bym lah ban pynkhih bad kawei kaba lah ban pynkhih.
Ïa kine ki jingdon jingem la kurup da ka jingïatreilang ki kynhun NIA ha Haryana, Punjab bad ka Uttar Pradesh hapoh ka jingtreikam jong ka Unlawful Activities (Prevention) Act, of 1967.
