New Delhi, K’lyngkot:
Ka Ministry of Home Affairs ha ka sngi Palei ka la hukum ïa ki bor sorkar jong ka Jammu & Kashmir ba ki dei ban kurup ïa baroh ki jingdon jingem bad ki Bank Account bad ki pisa kiba dei jong ki kynhun ba ju kyrshan ïa ki ‘riew pyrshah sorkar kiba dei na Pakistan kum ka Tehreek-e-Hurriyat bad ka Muslim League Jammu Kashmir, ba la khlieh da u ‘riew pyrshah sorkar u Masarat Alam. Kine baroh ar tylli ki seng dang shen ki la shah ñiew beaiñ ha ka sorkar.
Ïa ka Tehreek-e-Hurriyat la seng da u nongïalam ka kynhun pyrshah sorkar uba la khlad noh u Syed Ali Shah Geelani.
“Ha ka jingpyntreikam ïa ki bor ba hap hapoh ka kyndon 42 jong ka UAPA, ka sorkar kmie ka la buh hukum ba baroh ki bor ba la pyntreikam da ka hapoh ka kyndon 7 bad 8 jong kane ka aiñ ba la pynngat la dei ban pyntreikam ruh da ki sorkar jylla bad ha bor synshar jong ka UT ha kaba ïadei bad ki jingpyntreikam beaiñ jong ka kynhun,” la ong ka jingthoh ba la wan na ka MHA.
Ka kyndon 7 jong ka UAPA ka ïadon bynta bad ka bor ba la pyrkhing halor ka jingpyndonkam ïa ka pisa ka bym ïaid katkum ka kyndon jong ka kynhun ba la pyntreikam beaiñ bad ka kyndon 8 ka ïadei bad ka jingpyrshah halor ka jing-leh da ka bor ban pyndonkam ïa ki jaka ba la buh ne pyntreikam ïa ki seng ne kynhun ba treikam baeaiñ kiba ïaidlait na ki kyndon ba la buh.
