Shillong, K’Lyngkot 12
Ka nongbah Tura ka la sakhi ka jingplie ïa ka Pa Togan Nengminja Sangma Athletics Stadium bad ka jingthmu jong kane ka long ban pynlong kum ka shlem saiñdur na ka bynta ki nongïalehkai kiba don sap ha katei ka thaiñ.
Ïa kane ka stadium la ainam ha ka kyrteng u nongïaleh laitluid, u Pa Togan Sangma, ha ka jinglut kaba T. 16.02 klur.
Ïa kane ka stadium la plie ha ka sngi Thohdieng da u Myntri Rangbah ka Jylla u Conrad K Sangma ha ryngkat ka jingïadon lang u Lamphang ka Ïingdorbar thawaiñ, u Thomas A. Sangma, u Myntri ka tnat ïalehkai Bah Shakliar Warjri, u Myntri ba dei khmih ïa ka tnat Housing, PHE & Soil & Energy Conservation u Marcuise N. Marak, Bah John F. Kharshiing, Working Presi -dent ka Meghalaya Sports Olympic Association, ka Director jong ka tnat Sports & Youth Welfare Kong Isawanda Laloo, u Jagdish Chelani (IAS), Deputy Commissioner ka West Garo Hills bad Bah Finely. L. Pariat, General Secretary ka Meghalaya Athletics Association.
Kane ka stadium ka la long kaba biang pura bha bad yn pynlong ïa ki jingïalehkai athletics na ka bynta ka 5th Meghalaya Games ban sdang naduh ka lah sngi U Blei.
Na ka liang u Myntri Rangbah ka Jylla u Conrad K Sangma u la ong, “Ha ki snem ba la lah, ki nongïalehkai ka Jylla ki la wanrah burom ïa ka thaiñ. Kane ka jingïaid lynti ka la sdang naduh u snem 2020-21 ha kaba ïa kane ka projek la mang ha ka jinglut kaba T.16.02 klur.”
“Mynta ngi sngew sarong ba ngi la ïoh ïa ka jaka ïalehkai (synthetic athletic track) kaba don haduh phra laiñ, kaba la ïaryngkat kyrdan bad ki ri ka pyrthei. Ka jingdon ïa kine ki jaka ïalehkai ka long ka jingïarap ban sei ïa ki nongïalehkai kiba kynsai na kane ka thaiñ. Ngi la pynlut ruh na ka bynta ban sei ïa ki khynnah ïalehkai kiba dangrit ha kaba kin sa mih sa haduh 200 ki jaka ïalehkai kiba yn sa tei ha ka jinglut kaba T. 500 klur.”
“Ngi la khmih lynti ban nang pynïar na ka bynta ban buh ïa ki jaka sah jong ki nongïalehkai (hostel), ki jaka kilan met bad kiwei ki jingdonkam. Ngi la plie lad ruh na ka bynta kiwei ki jait jingïalehkai kum ka kriket, phutbol, ki jingïalehkai tynrai naduh mynbarim bad kiwei. Ka thong ka jong ngi ka long na ka bynta u snem 2032, te kumta ngi pynshlur ïa ki samla na Garo Hills ba kin pyndonkam ïa kine ki jaka ïalehkai khnang ba kin long kiba tyngshaiñ na ka bynta lawei ka ban wan.”
