Kolkata, K’lyngkot:
Ka kynhun Enforcement Directorate (ED) hynnin ka step ka la pynlong ïa ka jingleit khynra ha ki jaka sah jong u Myntri ka Fire and Emergency Services jong ka West Bengal u Sujit Bose, u MLA jong ka TMC u Tapas Roy bad u Chairman barim jong ka North Dumdum Municipality u Subodh Chakraborty ha kaba ïadei bad ki jingtohkit halor ka jingdon jong ka jingleh bymhok ha kaba ïadei bad ka jingthungkam ha ki Civic Bodies.
Ha ryngkat ka jingïatreilang ki kynhun shipai jong ka sorkar kmie, ki heh jong ka kynhun Enforcement Directorate ki la pynlong ïa ki jingleit khynra ha ki ar tylli ki jaka sah jong u Bose ha ka thaiñ Lake Town kaba don ha North 24 Parganas distrik hynnin ka step, u la ong.
Ki heh jong ka kynhun tohkit jong ka sorkar kmie ki la pynlong ruh ïa ka jingleit khynra ha ka ïingsah jong u Tapas Roy ha BB Ganguly Street bad ka jaka sah jong u Chakraborty ha Birati, u la ong.
“Ngi la pynlong ïa ki jingleit khynra ha ki jaka sah jong lai ngut ki nongïalam ka TMC ha kaba ïadei bad ka jingthungkam bymhok ha ki Civic Bodies. Ngi la ïakren ruh bad ki nongïalam,” la ïathuh ki heh ka kynhun ha ka jingïakren bad ki nongthoh khubor.
Ka kynhun jong ki pulit na ki jaka treikam jong ki pulit ka thaiñ ki la poi ha kitei ki jaka ba la pynlong ïa ka jingkhynra bad ki la kerkut ïa ka thaiñ baroh kawei.
