Guwahati, K’lyngkot:
Ka kynhun pyntriem jong ka National Socialist Council of Nagalim (NSCN-YA) ka la pynrem jur ha kaba ïadei bad ka jingkawang bom ki shipai ïada ri ha Changlang distrik jong ka Arunachal Pradesh ha ka 7 tarik, Kyllalyngkot. Ha ka jingthoh ba la phah, ka kynhun NSCN-YA ka la kynnoh ba ka la don ka jinghiar thma ba la leh da ki shipai ka tnat Indian Army na ka jaka treikam jong ki kaba don ha Nampong ha kaba ki la pynhap bom ha kylleng ka thaiñ kaba don hajan khappud Pangsau, ha kaba ka la long kaba donbok ba ym shym la don ki riewpaidbah ki ban ïap.
“Kane ka seng ka la pynrem jur ha kaba ïadei bad kane ka jingleh jong ki shipai, ha kaba la buh jingkylli halor ki daw ba la leh kumne ha kane ka thaiñ.” Ka kynhun NSCN-YA ka la pynpaw ka jingsngewkhia ha kaba ïadei bad kine ki jingleh jong ka tnat shipai Indian Army ha kaba ka la wanrah ka jingbym sngewtynnad ha kaba ïadei bad kane ka bynta ha ka thaiñ Naga bad kane ka la pynpaw ba ki shipai ka tnat Indian Army ki la long ki nongshun ïa ki Naga.” Ka tnat shipai Indian Army haduh mynta kam pat ai jubab ei ei ha kaba ïadei bad ka jingshah kynnoh pynhap bom.
