Itanagar, K’lyngkot:
Ha ryngkat ka jingïatreilang bad ka Military Intelligence (ECIB), ki shipai ïada ri bad ki pulit jong ka Longding, ki la don bynta ha ka jingleit khynra lehnoh ha ka sngi Palei, ha kaba na kane ka jingpyntreikam la ïoh ban kem ïa hynriew ngut ki dkhot ka kynhun National Socialist Council of Nagaland – Isak-Muivah (NSCN-IM). Kane ka jingpyntreikam ka la long hadien ka jingai jingtip jong ka Military Intelligence (ECIB), ha kaba hadien kane ka la don ka jingleit khynra ha ka thaiñ kaba don hapdeng ka shnong Longding bad Niausa.
Ïa kine ki briew kiba la shahkem la rah na ka bynta ban pynlong ïa ka jingtohkit kaba bniah. Na ka liang ki shipai ïada ri ki la pynjur ïa ka jingpyntreikam khnang ban ïoh ban kurup ïa ki tiar siat ba kine kiba la shahkem ki la ïathuh ba ki la buh ha ka shnong Knoknu bad Khasa, ha kaba ki la ïathuh ba kine ki tiar siat ki kynthup ïa lai tylli ki MQ Assault Rifle, ki bom pynbthei bad kiba bun ki tiar hiar thma.
