Guwahati, K’lyngkot:
Ka sorkar Assam ha ka pynbna ïa ka jingthmu pyntreikam ha kaba ïadei bad ka jingsam ïa ki Ration Card sha palat 42 lak ngut ki nongïoh myntoi kiba dang thymmai, ha kaba kane kan sa sdang naduh ka 16 tarik, Kyllalyngkot, 2024.
Kane ka jingpyntreikam ka long shi bynta ban ai jingkyrshan sha kito kiba donkam, ha kaba la pyntikna ban pynbiang da ki jingbam kiba tei bad ban pynïoh kiwei pat ki jingmyntoi hapoh ka jingtreikam jong ka Public Distribution System (PDS).
Ha ka jingïakren bad ki nongthoh khubor, u Myntri Rangbah jong ka Assam u Himanta Biswa Sarma u la ong, “Ka jingthmu jong ka sorkar jylla ka long ban pynbiang ïa ki Ration Card sha baroh ki nongshong shnong. Yn sa sdang ïa kane ha ka 16 tarik, Kyllalyngkot shaneng, ka sorkar jylla kan sa pynbiang Ration sha ki 42,85,745 ngut ki nongïoh myntoi kiba thymmai, ha kaba ïadei bad kane, la ong ba ka jingdon jong ki Card kan sa kham duna naba kawei ka Card kan kynthup mar 4 ngut ki dkhot ka longïing. Lada kheiñ ha ka jingdon jong ki Card, ka jingdon jong baroh ka long 10,73479 tylli. “
Shuh shuh u Sarma haba u la kren halor ki Ration Card u la ong ba kiba bun ki la pyni ïa ka dak kaba biang naba ka jingbun briew ka la kham biang.
Ka jingsam ïa ki Ration Card kan sa sdang naduh ka 16 tarik, Kyllalyngkot bad kan sa ïai bteng haduh ka 25 tarik, Kyllalyngkot, 2024, bad ba yn sa sam da ki Myntri ka Cabinet haman kawei pa kawei ka konstitwensi.
“Ngan sa sdang ïa kane na Jalukbari konstitwensi…na Ranjit Dass kaba don ha Mandiya bad Bajali… na Atul Bora kaba don ha Bokhakhat…na UG Brahma kaba ha Baksa…na CM Patowary ha Tihu…bad ki briew kin sa lah ban shim ïa ki na ki jaka ban buh naduh ka 25 tarik, Kyllalyngkot haduh ka 30 tarik, Kyllalyngkot”, la ong u Myntri Rangbah.
