Gaza, K’lyngkot:
Katkum ka kaiphod ba la ioh lum ha kane ka por, la ong ba ki don 4 ngut ki khynnah-samla kynthei kiba dang don ha kti jong ki lehnoh Hamas naduh ka por ba ki la shah rahbor ha kitei ki lehnoh ha ka 7 tarik u Risaw jong u snem 2023 ba la leit. La suba ruh ba kitei ki 4 ngut ki kynthei ki dei kiba dang khynnah tam eh napdeng baroh kito kiba la shah rahbor ha ki lehnoh Hamas sha Gaza.
Ha kawei ka dur-khih ba la saphriang bad iohi da ki bor pyniaid ka Israel, la iohi ia kitei ki 4 ngut ki khynnah kynthei kiba dang shah bat ha ki lehnoh Hamas tad haduh kane ka kynti bad ki bahaiing-hasem jong kitei ki khynnah ki dap da ka jingsyier bad jingsngewsih kaba khraw ban iohi ia ki khun ki kti lajong ba kin don ha ka kti jong ki lehnoh namar la sngewthuh ba ki lehnoh ki long kiba kheiñ duh bad ki bym ju kheiñ ia ka mynsiem briew jongno-jongno ruh. Namar kumba la ioh jingtip haduh mynta, ki dang don kumba 123 ngut kiba ka Hamas kam pat pyllait bad ka setkut ia ki ha ki jaka ba buhrieh bad ki ktem ba buhrieh jongka tad haduh kine ki sngi.
Napdeng jong ki 200 tam kiba la shah rahbor ha ki lehnoh Hamas sha Gaza, la ngeit ba kumba 23 ngut eiei ki dei kiba la khlad noh hapdeng ka jingiakhun thma jong ka kynhun lehnoh Hamas bad ki shipai ka Israel.
Kitei ki 4 ngut ki khynnah kynthei ki kynthup ia ka Agam Berger, ka Liri Elbag, ka Daniela Gilboa bad ka Karina Ariev bad la iohi ia kitei ki 4 ngut kiba ïeng da u laiñ bad kiba phai khmat sha ka kynroh ha ka jaka ba la pynieng ia ki ha ka por ba ki lehnoh ki ring ia katei ka video ban long kum ka jingmaham lane ka jing byrngem ia ka Israel.
Kaba kham sngew syier ka long ba katto- katne ngut na kitei ki khynnah kynthei, la i-kumba ki don dak jngem ha ryngkat ka snam tyrkhong kaba bit ha ka dur khmat bad ki bynta jong ka met jongki.
Hynrei katei ka video ka dei kaba la ring dur da ki lehnoh Hamas tang hadien khyndiat kynta ba ki la ioh ban rahbor ia kitei ki briew na Israel ha ka 7 tarik u Risaw.
Katkum ki khubor na ka BBC la ong ba kawei ka khynnah 19 snem napdeng jong kitei ki 4 ngut, ka la phah ia ka message sha iing jongka bad iathuh ba ka jaka ba ka ju sah ka la shah thombor ha ki lehnoh Hamas bad baroh kiba don ha katei ka jaka badka, ki la shah rahbor lut. Kumta katei ka khynnah ka la phah ia ka kmie jongka, ba kan buh jingduwai naka bynta jongki khnang ba kin lait na ki jingma bad ki jingjia ba sngewsih.
