Patna, K’lyngkot:
Ki pulit ki la buh ïa 72,062 tylli ki jingujor ejahar bad ïoh ban kem ïa 1.43 lak ngut ki briew bad ïoh ruh ban kurup ïa kumba 17,183 tylli ki kali kiba kynthup ïa ki trok bad ki kali kit mar kiba don bynta ban kit kyiad sha kylleng ki jaka.
U Additional Director General (ADG) jong ka jaka treikam jong ki pulit, u Jitendra Singh Gangwar, ha ka jingïakren bad ki nongthoh khubor, u la ong ba haba ïanujor bad u snem 2022, la ong ba ka jingdon jong ki jingujor ejahar ha kaba ïadei bad ki jingjia halor ka kyiad ka la long da 25% ha kaba ka la duna shibun ha u snem 2023 katba ka jingdon jong kiba la shahkem ka la hiar sha ka 16%.
Ha kaba ïadei bad kane ka bynta, ka jingdon jong ka kyiad kaba la ïoh ban kurup ha u snem 2023 ka la long 19% ha kaba ka la bun bad tam ïa u snem 2022, ha kaba ki pulit ki la ïoh ban kurup ïa 33.27 lak litre ka kyiad kaba kynthup ïa 18.63 lak litre ka kyiad phareng, 14.64 litre ka kyiad pyrsi.
Ha u snem 2022, ki pulit ki la buh 96,157 tylli ki jingujor ejahar bad kem ïa 1.71 lak ngut ki briew kiba la shah pynngat kyndon ha ka jingdihkyiad jong ki, kiba khaïi bad shet ïa ka kyiad.
“Ki la don kumba 180 tylli ki kynhun Anti-Liquor Task Force, 25 tylli ki kynhun jong ki ksew sma dien, ki Drone bad ki Speedboat ïa kiba la pyndonkam na ka bynta ban buddien bad kem ïa kito kiba la donkti ha ka kam khaïi kyiad ha ka jylla.
