Raipur, K’lyngkot:
Ka jingleit thwet ïa ki lehnoh Maoist ha Chhattisgarh ka la nang jur naduh u Naiwieng jong u snem 2023, bad ka la nang bun ha u bnai Naiwieng bad Nohprah jong u snem ba la lah, la ïathuh ki pulit katkum ka jingbuh jingthoh.
Ka jingbuh jingthoh kumba la ïoh lum da ka tyllong khubor ka ïohi ba ki la don tang saw tylli ki jingleit thwet ïa ki lehnoh Maoist ha u bnai Naitung bad Nailar, ha kaba ka la hiar noh sha ka ar tylli ha u bnai Nailur bad Risaw. Ha kaba ïadei bad kane, ka jingdon jong kine ki jingpyntreikam ka la kiew sha ki 12 tylli ha u Naiwieng bad 9 tylli la pynlong ha u Nohprah jong u 2023.
Ha u snem 2021, ki la don saw tylli ki jingleit thwet ïa ki lehnoh ha kaba mar kawei la pynlong ha u bnai Naiwieng bad u Nohprah. Hapdeng u Naitung bad u Nohprah 2022, ki la don kumba 29 tylli ki jingleit thwet ïa ki lehnoh Maoist ba la pynlong, bad ha u snem 2021 ka jingdon jong kine ki jingpyntreikam ka la long 26 tylli.
Kumba la ïathuh da ki heh ba dei khmih halor kane ka bynta, la ong ba ka jingdon bun eh jong ki Maoist kiba la shahkem ha ka shi bnai ha u snem 2023 ka la long ha u bnai Nohprah haba ki la don kumba 59 ngut ki lehnoh kiba la shahkem ha ki shipai ïada ri bad hashwa kane, ka la ong ha u Naitung haba ki la don kumba 15 ngut ki lehnoh kiba la shahkem. Ha baroh ki la don, 173 ngut ki Maoist kiba la shahkem hapdeng u Naitung bad u Nohprah ha u 2023, katba ki la don kumba 12 ngut kiba la shah siatïap ha ka jingïasiat bad ki shipai ïada ri.
Ha u 2022, ki la don kumba 16 ngut ki Maoist kiba la shah siatïap, bad ha u 2021 ki la don kumba 23 ngut ki Maoist kiba la shah pynïap ha kajuh ka por ha ki shipai ïada ri, la ïathuh ka tyllong khubor kumba la buh jingkheiñ.
Ka jingdon jong ki lehnoh Maoist kiba la leit pyndem hapdeng u Naitung bad u Nohprah ha ki ar snem ba la leit ka la hiar sha ka 324 ngut ha u 2021 haduh 128 ngut ha u 2022.
Ha kaba ïadei bad kane, ka jingdon bun jong ka jingleit thwet lehnoh ka la nang pynkiew ruh ïa ka jingdon jong ki riewpaidbah ba kin shah pynïap ha u bnai Naiwieng bad Nohprah.
Ki Maoist kumba la pynshisha la ong ba ki la pynïap ïa 12 ngut ki riewpaidbah ha u bnai Naiwieng ha u snem ba la lah bad arngut ki la shah pynïap ha u bnai Nailur ha kaba la sakhi ba ym shym don ki riewpaidbah ki ban shah pynïap ha u bnai Risaw.
Ki la don baroh kumba 17 ngut ki riewpaidbah kiba la shah pynïap ha ki lehnoh Maoist hapdeng u Naitung bad u Nohprah ha u snem ba la lah, la ïathuh ka tyllong khubor kumba la ïoh lum na ka jingbuh jingkheiñ.
Ha kajuh ka por kata ha u snem 2022, ki la don kumba15 ngut ki riewpaidbah kiba la shah pynïap ha ki lehnoh Maoist.
U heh sorkar uba la tip bad khmih bniah bha halor ki jingleit thwet lehnoh u la ong ba ïa ka jingleit thwet lehnoh la pynkhlaiñ bha ha ki thaiñ ba ju shah ktah jur ha ki kam pyntriem jong ki lehnoh Maoist ha ka thaiñ Bastar, hadien ka jingai hukum jong u Myntri ka sorkar kmie uba dei khmih ïa ka tnat ki kam pohïing u Amit Shah ban lah ban jynrat lut ïa ki ha ki ar snem ban wan.
