London, K’lyngkot:
U Myntri Rangbahduh ka Britain- u Rishi Sunak ha ka Sngi Thohdieng u la leit poi sha ka nongbah Kyiv jong ka Ukraine kum shi bynta ban leit pynpoi hi dalade ia ka song jingiarap na ka bynta ka tnat shipai jong ka Ukraine kaba don hapdeng ka jing-iakhun thma bad ka Russia. Katei ka song jing-iarap ba la pynpoi sha ka Ukraine ha kane ka por ka kynthup ruh ia ki ‘namding kiba lah ban siat jngai bad kumjuh ruh ia ki ‘Drone’ ban pynher na duriaw.
Namar la ong ba ka UK ka long kawei na ki ri kiba ai jingkyrshan ratbah ia ka Ukraine naduh ba sdang jong ka jingleit hiar thma ka Russia sha Ukraine ha kine ki snem ba la leit bad da kane ka song jingiarap jong ka UK ha kane ka por ka la kyntiew ia baroh ka jingiarap ba la noh synñiang da ka UK sha ka Ukraine hapoh jong kine ki snem ba la iaid ka thma sha ka 2.5 Billion baroh. Kaba la kiew da 200 Million lada ia-nujor ia ka jingphah jingiarap jong ka UK ha une u snem sha ka Ukraine ha kine ki 2 snem.
Ha kajuh ka por, ka Britain ka la pynbna ba kan iai kyrshan ia ka Ukraine tad haduh kaba kut jong ka thma bad kan phah ruh ia bun bah ki drone sha Ukraine kat kiba ka lah ban ioh na kiwei- kiwei pat ki ri, hynrei kiba bun hi pat kin dei kiba la shna bad pynmih hi da ka Britain.
Kumta, ka tnat iada jong ka Britain ka la pynbna ba kan long ka nongkyrshan ba ratbah jong ka Ukraine hapdeng ka jingiakhun thma jongka pyrshah ia ka Russia bad katba ka thma ka dang iai bteng, ka UK ruh kan nym sangeh ban phah ia ki lad jingiarap bad ban ai jingkyrshan ia ka Ukraine.
Shuh shuh ruh katkum ka kaiphod na ka ophis ki Myntri sorkar ka Britain, la ioh jingtip ba ka UKa bad ka Ukraine kin sa soi ia kawei ka soskular ka ban iadei bad ka ‘Security Co-operation’ lane ka jingiateh soskular ban ai jingkyrshan markylliang bad ban ai jingiada ruh markylliang haba poi kino- kino ki jingiakynad ne ka thma bad kiwei pat ki ri.
Kumta, ka Britain ka la ong ba katkum katei ka jingiateh soskular kaba yn ioh ban pyndep shen ha kine ki por ban wan, ka UK kan nang ioh ban ai jingkyrshan shuh- shuh ia ka Ukraine khamtam haba iadei bad ka suk- ka shngaiñ hapoh Ukraine kaba la shah pynthud bad wanrah jingeh da ka Russia ha kine ki 2 snem mynta.
U Sunak ha katei ka sngi u la ong ruh ba ka Ukraine mynta la 2 snem khlem shongthait ka la iakhun bad ka dang iai bteng ban iakhun doh-iap naka bynta ka jing laitluid bad ka hok synshar paidbah hapoh jong ka.
