New Delhi, K’lyngkot:
Ka sorkar kmie ka la don jingthmu ban pynduh noh ïa ki ïing ha ki jaka Slum kiba don ha Delhi wat lada ki la shah kular ban pynïoh da ki ïing kiba bha kumba la kular da ka seng BJP hashwa ka ilekshon, la pynshisha ka seng Aam Aadmi Party (AAP) ha kine ki khyndiat sngi.
Ka heh nongïalam jong ka seng AAP ka Atishi ka la pynshisha da kaba ong ba baroh ki kynhun ba dei ki trai jaka ki la shah hukum ba ki la dei ban weng noh ïa ki jaka Slum na kylleng ki jaka jong ka Delhi ha ka jingïalang ba la pynlong ha ki sngi ba la leit ha ka shlem treikam jong u Myntri Rangbahduh.
“Ha ki ar sngi ba la leit, ka la don ka jingïalang ba la pynlong ha ka jaka treikam jong u Myntri Rangbahduh. Baroh ki kynhun trai jaka ba buh ïa ki jaka Slum jong ka Delhi ki la shah khot ban don bynta ha ka jingïalang, bad ha kane ka por ki la shah bthah ba ki la dei ban weng lut noh ïa baroh ki jaka Slum kiba don ha kylleng ki jaka jong ka Delhi,” la ong ka Atishi, ka Myntri jong ka seng AAP kaba lamkhmat ïa ka sorkar ha Delhi ha ka jingai jingkren ha ka jingïalang bad ki nongthoh khubor.
Ha ka jingïalang la leit ban ïashim bynta da ki heh jong ka Municipal Corporation of Delhi, Delhi Development Authority (DDA), Railways bad kiwei pat ki heh jong ki kynhun bapher bapher, ka la ïathuh shuh shuh.
Ka Atishi ka la kdew shai ha kaba ka la ai nuksa ha kaba ïadei bad ka jingpynduh bad weng noh ïa ki jaka Slum hajan Sunder Nursery da ka Land and Development Office (L&DO), kaba hap hapoh ka jingkhmih jong ka Union Ministry for Housing and Urban Affairs, ha kaba la pynshisha ïa kine ki jingpyntreikam la leh da ka sorkar kmie ha kaba la kular ruh ban pynbiang jaka sah bad ïing ïa kine ki briew kiba shong basah ha ki jaka Slum.
Kumba la sakhi, la ong ba ha u bnai Naiwieng, ki ïing jong ki nongshong shnong ha ki jaka Slum kiba don hapdeng ka Sundar Nursery bad Delhi Public School ha kaba ki la don kumba 1,000 ngut haduh 1,500 ngut, ha kaba bun na ki ki dei ki briew kiba trei ïa ka kam tam tiar jot, ki nongdie jingdie ha ki lynti synkien, ki nongtrei bylla ïing briew bad ki nongbylla ha kiwei pat ki jaka, ki la shah pynpra lut hadien ka hukum ba la wan na ka ïingbishar.
Kine ki briew kiba shong basah ha kane ka jaka, ki la pynshisha da kaba ong ba ki la shah hukum ba kin mih na ki ïing jong ki tang ar sngi shwa ban leh ïa katei ka kam ha kaba na ka liang ka sorkar ruh kam shym la tyrwa jaka sah na ka bynta jong ki hadien ba kim don jaka shong jaka sah shuh.
