Beijing, K’lyngkot:
U President jong ka Maldives- u Mohamed Muizzu ha ka Sngi Ba-ar u la kyntu ia ka China ba kan phah shuh kham bun ia ki ‘riew shangkai pyrthei sha Maldives kum shi bynta ban kyntiew ia ka ioh ka kot jong katei ka ri ha ka liang ka kam jngoh kai pyrthei nangne sha khmat. Kane ka long hadien ba ki ‘riew shangkai pyrthei na India ki la pyndam noh ia ka jingleit jong ki sha katei ka ri hadien ki katto katne ki jingiathuh haba iadei bad ka jingkren jong ki Myntri Sorkar ka Maldives pyrshah ia u Myntri Rangbahduh ka ri India u Narendra Modi.
Ha katei ka sngi kaba ar, kaba u bteng ia ka jing-leit jurip ba san sngi jong u sha China, u Muizzu u la ong ba ka China ka long ka paralok bajan eh jong ka Maldives bad kumta ruh ka Maldives ka dang peit sha khmat ban ioh iatrei-lang shuh shuh bad ka China na ka bynta ki kam kiba dang sah bad ki jingthmu ne thong ba ka Maldives ka buh hapdeng ka jingiatrei lang bad ka China. Ha kajuh ka por ruh u Muizzu u la kam ba dei ka China kaba iarap ban kyntiew ia ka ioh ka kot jong ka Maldives ha kane ka por.
Namarkata, u la ïaroh ia ki projek ‘Belt & Road Initiative (BRI)’ ba la pynmih bad wanrah da u President ka China- u Xi Jinping ha u snem 2014, ha kaba u la ong ba kitei ki kam bad jingiatrei lang bad ka China, ki la wanrah jingmyntoi shibun ia ka Maldives. Dei na kane ka daw kaba la pynlong ia ka Maldives ba kan nang iai bteng bad pynskhem shuh shuh ia ka jingiadei bad ka jingiatreilang bad ka China ha kane ka por.
Hynrei ha kane ka por, u Muizzu u la kyntu ia ka China ba kan iarap ban kyntiew lem ia ka kam jngoh kai pyrthei hapoh Maldives da kaba pynbun ki nongleit jurip bad nongleit shang kai pyrthei na China sha Maldives ha kine ki sngi ban wan.
