Shillong, K’Lyngkot 14
Ka Shillong Lajong Football Club ka long kaba la pynkhreh ban ïakhun mynta pyrshah sa ïa ka North East United Football Club ha ka lympung ïalehkai Kalinga Super Cup ka ban long ha ka sngi Nyngkong ka 15 tarik mynta u bnai.
Kane ka jingïakhun ka ban long ha ka por 2 baje mynsngi ha Kalinga Stadium ha Bhubaneswar, kan dei kaba ar na ka bynta ka Shillong Lajong bad kumjuh ka North East United. Kine baroh ar tylli ki club ki dei kiba la mad ïa ka nam rem ha ka jingïalehkai sdang jong kane ka lympung.
Lah ban pynkynmaw ba ka Shillong Lajong FC ka la sdang ïa kane ka lympung da ka nam rem hakhmat jong ka Kerala Blasters Football Club kata da 3-1 kol bad kumta, mynta kan khmih lynti ban ïalehkai bha bad ban khur ïa ka jingjop. Kumjuh ruh na ka liang jong ka North East United FC kaba la shah rem noh da 2-1 kol ha ka Jamshedpur Football Club ha ka jingïalehkai kaba nyngkong, kan pyrshang katba lah ban khur jing-jop bad khur ïa ki 3 point pura na kane ka jingïaleh-kai.
Kumta la khmih lynti ba ka jingïalehkai hapdeng kine ki ar tylli ki club kan long kaba itynnad bad kaba ïakhaid bha namar baroh ar liang kin pyrshang ban wad ïa ka jingjop kaba nyngkong jong kane ka lympung ban ïaleh ruh ban plie lynti ban ïoh rung pat sha kawei ka round.
Ïa kane ka jingïalehkai kaba la khmih ba kan long shisha kaba itynnad bha, ki paidbah ki lah ban peit bad sakhi da la ki jong ki khmat, naba yn pynmih live ha ka Jio Cinema.
