Tura, K’Lyngkot 14
Ka jingpynkhreh ïa ka jingplie na ka bynta ka 5th Meghalaya Games ka la ïaid shakhmat ha kaba baroh ki nongïashim bynta ki la poi ha nongbah Tura ha ka step jong ka Sngi U Blei.
Ïa kitei ki nongïalehkai la pdiang sngewbha da ki dkhot ka Meghalaya State Olympic Association (MSOA) lem bad ki bor pynïaid District jong ka West Garo Hills ha ISBT, Tura.
Kane long ka sien kaba nyngkong eh ban pynlong ha ri lum Garo Hills ha kaba yn wan plie ïa ka da ka President ka ri, ka Droupadi Murmu ha P.A Sangma Stadium kaba ha Tura ha ka Lah Sngi U Blei bad ka ban kut haduh ka Sngi Saitjaiñ.
Kumta kane ka jingwan poi jong ka khliehduh jong ka ri, kan nang pynsah jingkynmaw shuh shuh ïa kane ka lympung bad kumjuh ïa u paidbah jong ka ri lum Garo.
Lada poi ban ïuhkjat mynta ha Tura, ka shong ka thaw bad ki kyntoit ki la kup ïa ka rong kaba itynnad hadien ba manla ki lad la wah ïa ki poster kiba heh bad kiba rit kumjuh ban pynpaw ia ka dak ba kum ka sor ka la khreh ban pdiang bad ban pynlong ïa kane ka lympung ïalehkai baheh ka Jylla bad ka ban ïaid beit ïaid ryntih.
Haba pdiang sngew-bha ïa ki nongïalehkai ha ISBT, Tura, la pynlong ïa ka put ka tem da ka kynhun tem jong ka Meghalaya Grassroots Music Project ha kaba ki jingrwai ki long na ka bynta kane ka lympung bad ki ban ai mynsiem ïa ki nongïaleh-kai ba kin ïalehkai bha.
Shuh shuh la pynbiang ruh ïa ki lad ai jingsumar ha ISBT na ka bynta ki nongïalehkai kiba don hapdeng ki jingmynsaw.
Ha ka por janmiet pat ki nongïalehkai ki la poi lut ha PA Sangma Stadium na ka bynta ban pynkhreh ïa ki prokram bapher bapher jong katei ka jingplie bad ruh ba kin hap ban bud ia ki kyndon na ka bynta katei ka jingwan ïuhkjat ka President jong ka ri.
Ha kane ka lympung yn ïashim bynta da kumba 3000 ngut ki nongïalehkai na kylleng ki district bapher bapher ki ban ïashim bynta ha ki 23 tylli ki jingïalehkai ki ban pynlong ha ki 16 tylli ki jaka kiba don ha ka nongbah Tura.
Lada kyrtiang dien sha kane ka lympung kaba la long ha u snem 2022, watla ha kaba sdang ka la don ka jingduna ha kiba bun ki liang, pynban hadien ba la lah ban weng ïa ki jingeh bad la pynbit pynbiang ka lympung ka la ïaid shakhmat ha ki 19 tylli ki jait jingïalehkai ba la pynlong ha ki 13 tylli ki jaka bad ïashim bynta da ki 3000 ngut ki samla.
Ïa ki jingïalehkai la pynlong ha Laban Indoor Stadium, Shillong Club, Madanrting Indoor Hall, Assam Regimental Centre, NEHU, Mawlai Mawroh Community Hall, Mawlai Madan Heh, Crinoline Swimming Pool, Malki Forest, Shillong Golf Course, NEIGRIHMS bad ha Sports Authority of India (SAI) Training Centre.
Ha kane ka lympung kumba 700 tam ki takma la lah ban sam sha ki samla ïalehkai ba la ïoh ban khur ïa la kin am jop ha ki jingïalehkai bapher bapher.
Dei ha ka sngi pynhap pyrda ïa ka lympung la ïoh ruh ban sakhi ïa ka jingpyni ïa ka rukom ïalehkai jong ka gymnastic ba la ai da ki khynnah barit jong ka Gymnastics Associa-tion of Meghalaya.
Ka jingpyni sap ki heprit ka la pynshohbiej ïa baroh kiba la wan ban sakhi ïa kane ka sap kaba ki don.
