Lucknow, K’lyngkot:
Ka Ghaziabad Municipal Corporation ka la dep ban pdiang ïa ka jingtyrwa ha kaba ïadei bad ka jingpynkylla kyrteng ïa ka Ghaziabad, la ïathuh ki heh ba dei khmih. Ka Mayor jong ka Corporation ka Sunita Dayal ka la ong ba ka jingtyrwa bad kumjuh ka jingai jingmut, kaba kynthup ïa ki lai tylli ki kyrteng kum ka Harnandi Nagar, Gaj Prastha bad Doodheshwernath Nagar yn sa phah sha u Myntri Rangbah jong ka Uttar Pradesh u Yogi Adityanath ha kaba un sa shim ïa ka rai ban jied ïa kine ki kyrteng.
Ka rai kaba khatduh ban jer ïa ka kyrteng kaba thymmai hadien ba la dep ban jied kan sa long hadien ka jingmynjur jong ka sorkar kmie.”Ka jingtyrwa na ka bynta ban pynkylla kyrteng ïa ka Ghaziabad ka dei kaba la pdiang da ka kynhun ba bun jong ki Councillor,” la ong ka Dayal ha ka jingïakren bad ki nongthoh khubor. “Kiba bun ki briew ki la dawa ba la dei ban pynkylla noh ïa ka kyrteng. Ha kaba ïadei bad ki jingtyrwa, bad hadien ba ka la don ka jingïamir jingmut bad ka Board, ïa ka jingtyrwa yn sa phah sha u Myntri Rangbah. Kan sa long da ka rai jong u Myntri Rangbah na ka bynta ban pynkylla kyrteng,” ka la bynrap.
U MLA jong ka seng Bharatiya Janata Party (BJP) na Sahibabad konstitwensi u Sunil Sharma ha u snem ba la lah u la ong ba ka la don ka jingtyrwa ha kaba ïadei bad kane ha ka ïingdorbar ha ka jylla, ha kaba la ai jingmut ba la dei ban pynkylla noh ïa ka kyrteng jong ka Ghaziabad sha ka Gaj Prastha. Ha kaba ïadei bad kane, u heh nongïalam niam jong ka Doodheshwer Nath Temple, u Mahant Narayan Giri, ha ka jingïakren bad ki nongthoh khubor u la ai jingmut bad buh da lai tylli ki kyrteng ha ka ban phah sha u Myntri Rangbah.
