Shillong, K’Lyngkot 14
Ka kynhun ïalehkai jong ka Galaxy Sports Club ka la ïoh rah ïa ka nam lahduh jong ka lympung 1st Jerlie E Tariang Memorial Knock-Out Football Tournament da kaba pynliem noh ïa ka Super Striker Sports Club ha ka final.
Haba phai sha ka jingïalehkai final jong katei ka lympung ba la pynïaid da ka Sainborlang Banjop Welfare Association, kaba la pynlong ha madan ïalehkai jong ka Shonroy Basan School, Lummawbah (Parmaw) ha ka sngi Saitjaiñ, ka Galaxy ka la lah ban pynliem noh da 1-0 kol ïa ka Super Striker.
Ha kane ka sngi, ka Dr Badaplin War kaba dei ruh ka khun jong i Bah (L) JE Tariang ka la ïadon lang kum ka kongsan. Ka kongsan haba ai jingkren ka la ong ba kano kano ka jingtbit ha kino kino ki kam ïalehkai ka dei kaba kongsan ban poi sha ka jingjop.
Kum ka longkmie, ka nonghikai ka la pynpaw ba ka don ïa ka jingïohi jngai bha haba ïadei bad ki samla jong ka jylla ba kin kiew ym tang ha ki kam ïalehkai hynrei ha kiwei ruh ki bynta. Ka la bynrap ruh da kaba ong ba baroh dei ban don ïa kata ka thong ban jop watla ha ka jingïaleh ka don ka jingjop bad ka jingrem.
Ka la kyntu ruh ïa ki samla ban long paralok bad ban ïa kyrshan kylliang watla kim dei na kajuh ka kynhun ruh. Ka la bynrap ruh da kaba ong ba khlem ka jingïasngewthuh jingmut bad ka jingïatreilang kim lah ban kynjoh sha kata ka thong kaba ki thmu ban poi.
La ïoh jingkren ruh na u Assistant Secretary Shnong Bah R Khongwir uba la pynpaw ïa ka jingkmen ba kum ka kynhun bad ka ïing ki la kynmaw burom ïa une u Rangbah uba ka shnong ka pynmih uba la noh synñiang ha ka imlang sahlang bad ha ka ri baroh kawei.
Ha kane ka sngi ka Sainborlang Banjop Welfare Association nalor ka khusnam lahduh bad ka khusnam sha kaba rem, ka la ïoh ban sam ruh ïa ki khusnam shimet kum ka nam Best Player sha u samla Rickymond Muktieh na ka Super Striker, Top Scorer sha u Lari Shanpru ha kaba u la thep haduh 6 kol ha kane ka lympung bad Best Goalkeeper la ïoh da u samla Wallam Khongshun na ka Super Striker.
