C.B Iawphniaw
Ka jaitbynriew jong ngi la ju khot kyllum kum U Khynriam, U Pnar U Bhoi, U War bad U Lyngngam. Nangta ki khot de u Synteng, U Maram, U Mylliem bad U Sohra. Ka jaitbynriew kaba rit la khot kyrteng da bun rukom.
Haba kumne ka jaitbynriew ka ïa long kawei ne ki don la ka jong ka jong ka dustur ka riti, haba ka kyrteng ka ïapher na kawei ka thaiñ sha kawei pat. ïa kine baroh mynta la ai kyrteng lang kum ka ri ki lyoh ne ka Meghalaya da u mynder. Hato phi sngewdei ïa ngi ki Khasi lane ki Hynñiewtrep yn khot ki nong Meghalaya?
Nalor nangta ki ong dang don sa khyndiat trep ne khyndai jait ha bneng. Shaei sha bneng? Kam dei shabar ka ri Khasei – Jaiñtia ki don sa khyndai jait ki Khasi – Pnar ? Ka la dei ka por ba ngi dei ban wad ïa kita ki khyndai trep shano ki don? Namar ki dei ki kur ki jait jong ngi ki Khasi – Pnar. Napdeng ki khadbynriew trep lane shi jhap 7 – trep kiba don na ri Khasi ki ai jait sha ka kmie.
Don kiba ïathuh khana pateng ba ki khyndai trep pat ki ai jait kpa ne jait kmie. Ha ki por mynshuwa ki ïathuh ba ki ai jait ha la ka mon ka mon, don kiba ai jait kpa don kiba ai jait kmie, ym kum mynta ki pynbor ban ai jait beit ïa ka jait sha ka kmie. Hato kane ka lah ban long ban shimjait kmie ym na u symbai jong u kpa?
