Shillong, K’Lyngkot 15
Ka lympung ïalehkai Under-16 Boys Football League 2023-24 ka la bteng biang ha ka lah sngi U Blei ha SSA Stadium Polo ha kaba ka Merinda FC, Mawreng SC bad ka Umphyrnai SC ki la khur ïa ka jingjop.
Ka Merinda FC ka la pynliem noh ïa ka Upper Shillong Colt da 8-0 kol na ka bynta ban khut ïa ka jingjop kaba lai. U Mebankhraw Wahlang (4 & 30), Bestius Nongbasap (5 & 43) bad u Mebankitlang Mawlong (49 & 60) ki la thep mar ar kol, katba ïa ki shi kol la thep da u Kevindonald Kharbuli (17), bad u Bankyrshang Diengdoh (50).
Ka Mawreng SC ka la pynjem khnap ïa ka Lumshyiap SC haduh 9-0 kol. U Bashemphang Jana u la khur ïa ka hat-trick da kaba thep haduh saw kol ha ka minit kaba 16, 27, 38 & 53. U Richborn Kharpuri (15 & 48) bad u Aryan Nongkhlaw (37 & 45) ki la thep mar ar kol, katba ïa ka shi kol la thep da u Wanstepbansan Soh-lang (52).
Ka PFR FA ka la shah rem noh ha ka Umphyrnai SC da 1-3 kol. Ïa kine la thep da u Ricky Kharkongor (2), Arjunson Kharkongor (36) bad ïa kawei pat la ïarap pynthep da uwei na ki rangïalehkai ka PFR u Arkirang Nongrum (37). Hadien shi minit ka PFR ka la lah ban pynphai kylla shi kol lyngba u Mewanlang Laloo (38).
Haba phai sha kawei pat ka jingïakhun hapdeng ka Lah Bet SC bad ka Mawpat SC ki la ïasam mar shi point hadien ba ki la ïakhaid mar 1-1 kol. Na ka Lah Bet la thep da u Melbertson Kharkongor (47), hynrei ka Mawpat ka la lah ban pynphai kylla lyngba u Domiwell Kharkongor (60).
Haba phai sha ka 1st Division Football League 2023-24 kan bteng biang ha ka sngi Ba-ar ha kaba ka Mylliem SC kan ïakhun pyrshah ïa ka Laitkor SC ha ka por 2:15 janmiet.
