Shillong, K’Lyngkot 15
Ka Meghalaya ka la lah ban pyni ïa ka jingkhlaiñ bor pyrshah ïa ka Manipur ha kaba kut ka sngi kaba ar jong ka U-23 men’s Col CK Nayudu Trophy kaba la long ha Surat.
Ha kane ka jingïakhun ka Manipur ka la jop ïa ka kynting pisa bad kam trai ban tied nyngkong ha kaba baroh ki nongtied ki la shah pynkhyllem lut hadien ba ki la lah ban kamai 257 run na ka 121.5 over.
U Manish Sharma marwei u la ïoh ban khur 6 wiket na ka bynta 50 run ha ki 36 over, khlem da klet ban pynkynmaw ba u la ïoh ruh ban khur 14 tylli ki wiket ha ka por ba ka Meghalaya ka la lah ban pynliem noh ïa ka Sikkim.
Haba wan shimti ïa ka pali kaba ar, ka Meghalaya ka la kynjoh sha ki 230 run na ka bynta ki 4 wiket ha ki 59 over, ha kaba ka dangsah sa 27 run. Ki lai ngut ki nongtied ki la lah ban kamai ïa ki shiteng spah run kiba kynthup ïa u Nishanta Chakraborty (66 run na ki 62 bol), Aman Kumar (65 run na ki 141 bol) bad u kapten u Kevin Christopher (57 run na ki 90 bol).
Ha kane ka jingïakhun u Nishanta u la lah ban khyrwit ia 11 tylli ki ‘four’ bad kawei ka ‘six’, bad u Aman u la lah ban kynjoh sha ki 91 run na ka bynta ka wiket kaba ar. U Kevin u la khmih lynti ban ïalehkai bha ha ka sngi kaba bud ryngkat u Joydeepan Deb.
