Cairo, K’lyngkot:
U Myntri ka tnat kam bar ri jong ka China- u Wang Yi ha ka Sngi U Blei haba ai jingkren ha ka sngi ba ka thma hapdeng ka Israel bad Gaza ka la dap 100 sngi, u la ong ba ka Israel ka dei ban sangeh noh ia ka thma namar ka jingshah ktah jur ki paidbah nongshong shnong ka Gaza bad da ki hajar ngut ki la shu duh ei la ka jingim tang namar ka jingleit hiar thma ba khlem sangeh jong ka Israel.
Haba ai jingkren sha ki lad pathai khubor hapoh Sameh Shoukry jong ka nongbah Cairo, utei u Myntri ka China u la kyntu ia ka Israel ba kan wad lad kumno ban ïoh ïasuk noh bad ka Gaza khnang ban lah tehlakam ia ka jingïap jong ki paid nongshong shnong ba lui-lui ka Gaza.
Kumta la ong ba utei u Myntri kam bar ri jong ka China ha ka jingïakynduh bad u Myntri na Egypt, baroh ar ngut kitei ki nongïalam ki la kyntu ïa ka Israel ba kan shim ïa ki lad ki lynti kumno ban pynduna noh ïa ka jingleit thombor, ka jingpynïap dusmon bad jingpynsaja ïa ki paid nongshong shnong ba lui-lui jong ka Gaza.
Namar la ong ba ka Israel ka la leit pynhiar kput ia ka Gaza khlem jingpyrkhat shuh pat wat ia ki paidbah kiba shong ha katei ka nongbah ba la synshar hi da ki lehnoh Hamas bad kane ka la sdang naduh ba kitei ki lehnoh Hamas ki la leit ban thombor bad hiar thma ia ka Israel ha ka 7 tarik u Risaw jong u snem 2023.
, ha kaba ki la ther dusmon da ki spah hajar tylli ki ‘namding sha Israel haduh ba ki tiar iada lane ka ‘Iron Dome’ ba la buh da ka Israel ruh kam lah shuh ban tehlakam ia kitei ki ‘namding jong ki lehnoh Hamas ha katei ka sngi. Nalor kata, ki la leit ban rung sha ki shnong ba khappud jong ka Israel bad ki la pyniap dusmon ia ki paidbah nongshong shnong jong ka Israel bad ha kaba khatduh ki la rahbor syndon kumba 240 tam ki briew na Israel kat kiba don ha ka lynti iaid jongki naduh kiba dei ki nongshong shnong trai ka Israel haduh kito kiba shu leit ban shong shipor ha Israel. Ha katei ka jingleit hiar thma jong ki lehnoh Hamas sha Israel, la ioh jingtip ruh ba kitei ki lehnoh ki la leh don bor haduh katta bad ki la batbor naphang ia ki kynthei khynnah bad samla jong ka Israel bad haduh kine ki sngi ruh ki dang don sa kumba 100 ngut kiba la shah rahbor ha kitei ki lehnoh bad kiba ym pat shah pyllait. Napdeng kitei kiba dang don ha ka kti ki lehnoh, ki don 4 ngut pat ki khynnah- samla kynthei naduh kaba dang 15 snem haduh 19 snem ka rta bad kiba dang shah bat ha ki lehnoh Hamas haduh kine ki sngi.
