Shillong, K’Lyngkot 15
Ka Meghalaya ka la don ha ka thup ba kham jwat na ka bynta ka wat ba khatduh (final) jong ka 77th National Football Championship (Santosh Trophy 2023-24), la pynbna ka All India Football Federation.
Kane ka kynhun ïalehkai ka nongbah kaba la wan ba-ar ha u snem ba la lah, ka la don ha ka Group-A kaba kynthup ïa ka Arunachal Pradesh, Goa, Assam, Services bad ka Kerala.
Ïa kane ka lympung yn pynlong ha Yupia, Itana-gar, Arunachal Pradesh naduh 21 tarik u Rym-phang haduh 9 tarik u Lber 2024. Ïa baroh ki jingïalehkai yn pynlong ha Golden Jubilee Stadium.
Ïa ki 12 tylli ki kynhun yn phiah ha ki ar tylli ki group (kiba don mar 6 tylli ki kynhun). Ka Aruna -chal Pradesh, Karnataka kaba la rah ïa ka nam lahduh ha u snem ba la lah bad ka Meghalaya, ki dei ki kynhun kiba la ïoh rung suk sha wat ba khatduh. Katba ki khyndai tylli ki ki kynhun kiba la ïoh rung na ki hynriew tylli ki group (Goa, Delhi, Manipur, Assam, Services & Maharashtra), lem bad lai tylli kiba la wan ba ar (Kerala, Mizoram and Railways).
Kiwei pat ki kynhun kiba don ha ka Group-B ki long ka Karnataka, Maharashtra, Delhi, Manipur, Mizoram bad ka Railways.
Ïa ki jingïakhun Quarter-final yn pynlong ha ka 4 bad 5 tarik u Lber, katba ïa ka Semi-final yn pynlong ha ka 7 tarik bad ka final kan long ha ka 9 tarik.
