Shillong, K’Lyngkot 15
Ka Shillong Lajong FC ka la mad biang ïa ka jingshah rem kaba ar ha ka lympung ïalehkai jong ka Kalinga Super Cup, hadien ba ka la shah pynliem noh ha ka North-East United da 2-1 kol ha ka Lah Sngi U Blei ha Kalinga Stadium kaba ha Bhubaneswar.
Kane ka long ka jingshah rem kaba ar ïa kane ka kynhun ïalehkai ka nongbah hapoh ka jingïalam u Bah Bobby L. Nongbet (coach) bad kham hashwa ka la shah rem noh ha ka Kerala Blasters FC da 3-1 kol.
Ha kane ka jingïakhun ka Lajong ka la sdang ban ïalehkai bha da kaba ïoh ban pynkhih jar nyngkong ha ka minit kaba 17 lyngba u rangïalehkai sha-khmat na Brazil u Douglas Tardin. Kane ka shi kol ka la ïai neh haduh kaba kut jong ka kylla step.
Dei dei hadien ba la bteng ïa ka jingïakhun jong ka kylla miet ba ka North-East United ka la lah ban pynphai kylla ha ka minit kaba 60 lyngba u rangïalehkai shakhmat na Spain u Nestor Albiach bad une u rangïalehkai u la thep biang sa shi kol ha ka minit kaba 66 lyngba ka penalty bad haduh kaba kut ka la lah ban pynthikna na ka bynta ban khur ïa ka jingjop kaba nyngkong ha kane ka lympung.
Ka Lajong kan pyn-khreh ïa kawei pat ka jingïakhun pyrshah ïa ka Jamshedpur ha ka sngi Saitjaiñ ha ka por 2 baje janmiet ha kajuh ka madan.
