Tura, K’Lyngkot 15
Ka kynhun ki rangïaleh-kai phutbol ka Ri-Bhoi bad ka West Garo Hills District ki la jam sha ka semi final ha ka jingïalehkai phutbol ki shynrang jong ka 5th Meghalaya Games ba la long ha madan Chanmari, Tura.
Haba kane ka jingïakhun kaba la long ha ka lah sngi U Blei ha madan Chamari, ka Ri-Bhoi ki la lah ban pynliem noh ïa ka East Jaiñtia Hills da 3-0 kol. Ïa kine ki lai tylli ki kol jong ka Ri-Bhoi la ïoh ban thep da u Riskhem Syiem Jefree Kyrsain bad u N Syngkli.
Haba phai pat sha kawei ka jingïalehkai, ka West Garo Hills ka la lah ban pynliem noh ïa ka South Garo Hills da 7-1 kol.
Na ka liang ka West Garo Hills la ïoh ban thep da u Baltimas K Marak, Nangrim M Sangma, u Dimsrang Ch Sangma, R. D Sangma bad u Kim Kim D Sangma.
Ka jingïakhun ha ka sngi Ba-ar ha ka liang ki kynthei kan long hapdeng ka Ri Bhoi pyrshah ïa ka East Jaiñtia Hills (8AM) bad ka West Khasi Hills ïa ka West Garo Hills (10AM), katba ha ka liang ki shynrang kan long hapdeng ka Eastern West Khasi Hills pyrshah ïa ka East Garo Hills (12PM) bad ka South West Garo Hills ïa ka East Khasi Hills (2PM).
