Tura, K’Lyngkot 15
Ka jingïalehkai jong ka badminton na ka bynta ka 5th Meghalaya Games ka la sdang ha ka lah sngi U Blei ha Tura Indoor Hall, Hawakhana.
Haba phai sha ki jingïakhun jong ki shynrang ha kane ka sngi sdang, u Mewanlamkupar (Eastern West Khasi Hills) u la lah ban pynliem noh ïa u Hunbait S Manner (West Jaiñtia) 18-21, 21-11 bad 23-21. Ha kawei pat ka jingïakhun, u Stephan Marweiñ (East Khasi Hills) u la lah ban pynliem noh ïa u Biswajit Ghosh (West Garo hills) da 21-18, 20-22, 22-20. Katba u Civilo Ch Momin (South West Garo Hills) u la lah ban pynliem noh ïa u Nangkiewshaphrang (Eastern West Khasi Hills) da 23-21, 21-19.
U Gaurav Dutta (West Garo Hills) u la jop da kaba suk ïa u Jefrryford Lyngdoh (West Khasi Hills District) da 21-16, 21-11, kumjuh u Enrique Syiem (Ri- Bhoi) u la pynliem noh ïa u Banshanlang Parïong (West Khasi Hills) da 21-12, 21-10, u Raynel Kharbuki (East Khasi Hills) u la la pynliem noh ïa Banshanbor Lamare (West Jaiñtia Hills District) da 21-9, 21-14.
Haba phai sha ka jingïakhun jong ki kynthei, ka Dabiangsakani (West Jaiñtia Hills) ka la lah ba kan pynliem noh ïa ka Baphishisha Marshillong (West Khasi Hills) da 21-18, 21-12.
