Shillong, K’Lyngkot 15
Ka BJYM Meghalaya ka la pynrem jur ïa ka jingbym don jingtip jong ka Sorkar Jylla, ka tnad ba dei khmih lem bad ki ophisar da kaba pyni ïa ka dur jong u Lat ka Jylla ha ryngkat ka jingthoh, “Meghalaya welcomes Smti Droupadi Murmu Hon’ble President of India on her maiden visit to the state” ha ka jaka ka dur jong ka President ka ri.
“Kane ka jingbym tip kam dei ka jingpynjah burom tang ïa ka President ka India hynrei ka jingpynjah burom ïa ka Riti Synshar ka Ri ha kaba ka ophis jong ka President ka dei ka kyrdan ba la pynkup bor da ka Riti Synshar ka Ri bad ngim lah ban pdiang ïa kaba kum kane ka jingpynjah burom ïa ka khlieh Riti Synshar jong ka ri, kata ka Bharat,” ong ka kyrwoh na u State President ka BJYM, Bah Mewaker Lyngdoh.
U la ong ba kane ym tang ba ka pyni ïa ka jingbym tip hynrei ka kdew ïa ka jingshim sting ïa ka kam hapoh ka Jylla naba kam don ka jingminot haba ïadei bad kano-kano ka kam kaba la bynshet.
“Ka long ka jinglehraiñ kaba khraw ïa ngi ki nongshong shnong ka Jylla ba kiba kum kine ki jingbakla ba rit ki pynlong ïa ka Jylla jong ngi ban paw pyrthei bad ngi long ka jingshah rkhie beiñ hakhmat ka ri baroh kawei. Lehraiñ! Lehraiñ! Lehraiñ!,” pynkut ka kyrwoh na utei u nongïalam.
