Jowai, K’Lyngkot 15
Ka Catholic Youth Mihmyntdu bad ka Sabah Muswang ki la lah ban pynthikna na ka bynta ban jam sha ka semi final ha ka lympung ïalehkai Under-13 Republic Day Cup Football Tournament 2024 ba la pynïaid da ka West Jaiñtia District Sports Association (WJDSA).
Kane ka la wan hadien ba ka Catholic Youth ka la pynliem noh ïa ka Ïawmulong Nartiang da 1-0 kol, katba ka Sabah Muswang ka la jop ïa ka Ïongpiah da 6-5 kol lyngba ka tie-breaker ha ka jingïakhun quarter final kaba la long ha madan Kiang Nangbah Stadium Ladthadlaboh, Jowai ha ka lah sngi U Blei.
Ïa ka kol jong ka Catholic Youth Mihmyntdu la thep da u Wanbha Phawa ha ka minit kaba 21.
Ka jingïakhun hapdeng ka Sabah Muswang bad ka Ïongpiah ka la kut ha ka jingïakhaid da mar 3-3 kol. Kumta ban ïoh ïa ka rai jop rai rem ki nongpynïaid ki la rah noh ïa ka jingïakhun sha ka tie-breaker bad dei hangne ba ka Sabah Muswang ka la khur ïa ka jingjop.
Ïa ki kol jong ka Ïongpiah la thep da u Freddy Tariang ha ka minit kaba 7 & 13 bad u Dayoohi Laloo haka minit kaba 51. Katba ïa ki kol jong ka Sabah Muswang la thep da u Wohjrem Shylla ha ka minit kaba 18, u Clifford Shadap haka minit kaba 28 bad u Kyrchanlang Chyrmang ha ka minit kaba 58.
