Pyongyang, K’lyngkot:
Ka North Korea ha ka Sngi Nyngkong ka la pynbna ba ka jingpyrshang ban siat ïa u ‘namding ‘Solid-fuel Ballistic Missile’ ka la long kaba seisoh ha kane ka sien. ïa kane la ïoh jingtip shwa na ka South Korea kaba la ïathuh ba ka North Korea ka la pynher ‘namding biang wat hadien ki kynrum- kynram bad ki jingïakynad ha kane ka taïew ba la lah.
ïa utei u ‘namding, la pynher ha ka por shiteng sngi jong ka Sngi U Blei bad la thep da ki tiar pynbthei kiba khlaiñ bha kiba la ju tip kum ki ‘Hypersonic Maneuverable’.
Ka jingthmu jong katei ka kam ka long ban peit thuh ïa ka jinglah bad jingkhlaiñ bor jong utei u ‘namding ba la thep da kitei ki tiar kiba khlaiñ bor.
Ha kajuh ka por ruh, ka North Korea ka la ong ba ka jingpynher ‘namding jong ka, kam ju ktah ïa kiwei pat ki ri bad kumta ruh kam don eiei ban pynthut ïa ka shongsuk- shongsaiñ jong kiwei pat ki ri kumba la ioh ïa ka jingpyrshah na ki ri ba don marjan bad ka North Korea kynthup ïa ka United States bad ka South Korea.
Hynrei la ong ba kane ka khubor, ka long ruh tang hadien katto katne sngi ba ka North Korea ka la ther bom bad ther ‘namding naphang sha ki bynta khappud ba markhap bad ka South Korea bad kaba la wanrah jingma ïa ka South Korea, ha kaba ka South Korea ha ka taiew ba la leit ka la pynbna ïa ka jingpynkhreh jongka ban ialeh pyrshah ïa ka North Korea lada jia ba shah hiar thma lane ki jingleh jong ka North Korea ki la pynthut ïa ka shongsuk-shongsaiñ jong ka South Korea.
Ka North Korea ka la pyntip ba utei u ‘namding ba ha ka Sngi U Blei, u la her sha ki bynta Mihngi jong ka duriaw bad kumba 1,000 Kilometre lane 621 Miles ka jing jngai ba utei u ‘namding u la ioh ban iaid lyngba sha katei ka bynta.
