New Delhi, K’lyngkot:
Kum shi bynta ban pyntikna ba ki briew ki la phai khmat na ka bynta ka ilekshon Lok Sabha, u Rahul Gandhi, uba long u heh nongïalam jong ka National Congress Party, u la thmu ban pynlong ïa ka jingïalang paidbah ha Ranchi bad Guwahati.
Ka jingïaphylliew jingmut bad ki paidbah kan sa long kum shi bynta jong ka Bharat Jodo Nyay Yatra.
U Rahul Gandhi, u la pynbna ban pynlong ïa ka Bharat Jodo Nyay Yatra ka ban sa sdang na Imphal ha ka 14 tarik, Kyllalyngkot kata mynta ka sngi, ha kaba yn sa lah ban lum lang ïa ki paidbah na ka bynta ban pynbna ïa ki mat treikam jong ka Congress.
Ïa ka jingïakren bad ka jingïaphylliew jingmut la thmu ban pynlong ha Guwahati ha ka 23 tarik, Kyllalyngkot bad ha Ranchi kumba la buh sngi ha ka 6 tarik, Rymphang.
Kumba la ïathuh ka tyllong khubor kaba la wan napoh ka Congress, la pynpaw ba kine ki jingïakren kin sa long na ka rynsan na ka bynta ki paidbah ban pynsngew ïa ki mat ba ïadei bad ki bad ban tip ïa ki lad ban buh ha ki mat treikam.
Kane ka jingïohlad ban ïamir jingmut bad ki nongshong shnong jong ki jylla bapher bapher, kan sa ïarap ha ka ban lah ban pyntreikam ïa ki jingthmu ba ka seng ka don na ka bynta ban ai jingmyntoi ïa ki riewpaidbah khamtam kito kiba ju ïakynduh ïa kiba bun ki jingeh.
Ka seng ka la kular ban pynïoh sha kine ki nongshong shnong ïa ki lad jingïarap ba bun.
Ha ki jingïalang ban pynlong ha Guwahati, ka jingthmu pyntreikam kan long na ka bynta ka thaiñ Shatei-lam- Mihngi, katba ka jingïalang ha Ranchi ka jingthmu pyntreikam kan long na ka bynta ka kynhun riewlum.
