Sa shisien pat, ki jingbym biang ha ka jingpynkhreh ïa ka Meghalaya Games 2024 ki la paw tyngkreiñ, bad kaba kham pang met ka long ban ïohi ïa ka rukom ai bam ïa ki samla/khynnah kiba ïashim bynta ha ki jingïalehkai bapher-bapher. Kumno kat ïa ki nongïalehkai yn shu ai bam tang da ki ‘chips’, ‘samosa’, shana kiba lah ban pyndap lyer pynban ha ka jaka ban tei ïa ka met ka phad? Ka sorkar ka la pynbna ba ka jingmang ban pynlut na ka bynta kane ka lympung ïalehkai ka long haduh T. 23 klur. Kane kam dei ka pisa barit baria na ka bynta ki 3,000 tam ki nongïalehkai bad kiwei ki nongkitkam, nongïalam lynti, nongtrei sorkar bad kumta ter-ter.
Ha ka jingshisha, na ka bynta shi taïew, ka bam ka la dei ban biang nadong shadong – naduh ka sha step, ja sngi, sha sngi, ja miet – khlem don jingduna namar ka pisa ka pahuh. Lada ka pisa kam pahuh, ka sorkar ka dei ban shim da ka ram tang ban biang ki nongïalehkai bad kiwei kiba ïadon bynta ha kane ka lympung. Ki nongpynïaid ki la dep tip lypa ba kin don bun ki nongwan ïashim bynta, bad kim lah ban leh kum ki bym tip eiei. Namarkata, ki dei ban shim ïa ka jingkitkhlieh halor kine ki jingbym biang. Lehse ha kiwei ki bynta ki lah ban don ki jingbym biang bad yn ym da sngewpher than namar ka dei ka kam paidbah, hynrei ïa ka bam ngim lah ban pdiang ban don jingduna. Ki nongpynïaid ki khlem kyntait ba kam don ka jingduna ha ka jingpynbiang bam. Ki la kubur ba ka don. Haba ki la pynkhreh da ki bnai bad taïew, kumno kumta ki dang lah ban ai daw da kumne bad da kumtai? Kane baroh ka pyni ïa ka jingbym nang kita ki nongkitkam ba kin trei ïa la ka jong ka kam kaba ki la shimti da ka mon sngewbha.
Ha kawei pat ka liang, ngi ïohi ïa ka jingbunkam ban pynthaba bad pynkhuid sharum shaneng ha ki surok na ka bynta ban pdiang sngewbha ïa ka President ka Ri India. Ngi sngewnguh ba ka la wan ban jngoh ïa kane ka jylla kaba don shajngai na ka nongbah Delhi. Ka dei ruh ka jingkitkhlieh ym tang jong ka sorkar, hynrei baroh ki nongshong shnong ba ka President kan mad ïa ka jingsuk haba ka don ha kane ka jylla bad kan lait na kino-kino ki jingeh. Ngim kwah ban shah pynbud nam. Tangba ngim dei ruh pat ban klet ïa ki nongïalehkai khamtam ba ki dang dei ki khynnah/samla kiba dang donkam bha ïa ka bam ka dih kaba paka. Lada mlien sah ban ai ïa ki jingbam tad dor bad ki bym don jingtei, ki khynnah/samla ki lah ban ngat ha ki jingshitom bad kin sa jynjar ban bteng ïa ka jingïashim bynta ha ki jingïalehkai. Mano ban kit khlieh ïa kata?
Na ka por sha ka por, kita ki heh sorkar ki ïakren ba dei ban sei ïa ki ‘rang bad ki ‘thei kynsai ki ban ïashim bynta wat haduh ha ka lympung Olympics. Mano pat ki ban nud ban bteng sah ban ïalehkai lada tang ïa ka bam kaba tei ruh ym lah ban pynbiang bha? Hato kim duh mynsiem ki nongïalehkai haba ki shah kheiñ dewthala? Ngin khmih lynti leh aïu ba kin ïa kiew irat lada ka sorkar hi ka lehbeiñ ïa ki? Kane kam dei ka sien banyngkong lane ba khatduh ba kum kine ki jingduna bad jingbym biang kin paw pyrthei haba pynïaid da ka sorkar bad ki shnat bapher-bapher. Ha kajuh ka por, kane ka jingjia ka pyni ruh ba ka sorkar bad kiwei ki khlem pat pynbeit ïa ki jingduna watla ki la don teng kum kine ha ki snem ba mynshwa. Barabor, dei ban shim kum ka jingsneng bad jinghikai lada don ki jingbym biang khnang ban lah ban pynbeit ha kawei pat ka por haba don kiba kum kijuh ki kam.
Ki dang sah sa saw sngi hashwa ban khang pyrda ïa ka Meghalaya Games 2024. Ngin ïa peit ha kine ki sngi kiba dang sah aïu ki nongpynïaid kin leh ban pynbeit ïa ki jingduna. Hadien ba kut kane ka lympung, dei ban don da ka jingtohkit kaba khlaiñ bad kaba ym shah liang ban wad mano kita kiba donkti sha lyndet jong ka jingmih ki jingbym biang ha ka bam ka sa na ka bynta ki nongïalehkai bad kiwei. Dei ban tohkit ruh la ka la don ne em ka jingpyndonkam bakla ïa ka pisa ba la mang na ka bynta kane ka lympung.
