Agartala, K’lyngkot:
U Myntri Rangbah jong ka Tripura u Manik Saha u la pynpaw ka jingkyrmen ba ka seng BJP kan sa ïoh ïa ka jingjop ha palat 450 tylli ki konstitwensi ha ka ilekshon ban wan jong ka Lok Sabha.
U Saha u la ong ïa kane ha ka por u la ïashim bynta ha kawei ka prokram ha 8-Town Bardowali Assembly Constituency. Ha ka por ba la don kane ka prokram u la dro ïa ka dur jong u tiew Lotus kaba dei ka shap jong ka seng BJP ha ka kynroh.
“Ka thong jong ngi ka long ban ai ar tylli ki syntiew Lotus na ka jylla jong ngi sha u Myntri Rangbahduh u Narendra Modi ha ka ilekshon Lok Sabha ka ban sa wan da kaba jop ha baroh ar tylli ki konstitwensi. Ngi thrang ban ïoh pynlong Myntri Rangbahduh biang ïa u Narendra Modi sa shisien pat. Katkum ka jingkhmih bniah na ki rukom treikam, la tikna ban ïohrah ïa ka jingjop. La tikna ban jop ha ki 450 tylli ki konstitwensi, ka BJP kan sa thaw sorkar biang sa shisien,” u la ong.
U Saha u la ïai ban da kaba ong ba ka jingpynlong ïa ka Campaign ban thoh jingthoh ha ka kynroh ka dei ka bynta kaba kongsan jong ka rukom pyntreikam jong ka BJP ha kaba ïadei bad ka ilekshon, bad ka seng ka la ïakren bad kiba bun ki kynhun ha kaba ïadei bad ka jingpynkhreh na ka bynta ka ilekshon Lok Sabha, 2024.
“Ki prokram ha ka Campaign ki dang ïai bteng ha kylleng ki jaka jong ka jylla. Naba nga la ngeit ba ka seng BJP kan sa ïoh jingjop ha ki 404 tylli ki konstitwensi ha ka ilekshon ban wan jong ka Lok Sabha, nga la kyrmen ba kan sa jop palat 450 tylli ki konstitwensi. Ngi la rai ban ai ar tylli ki syntiew Lotus na Tripura sha u Myntri Rangbahduh ha ka ilekshon 2024, kum shi bynta ban pynpaw pyrthei bad ai mynsiem ïa ki rukom treikam jong ka seng BJP. Ka la don jingthmu babha ha kaba ïadei bad ka jingïakynduh ïa ki nongbud jong ka seng ha ki prokram ba la buh ha Bardowali AC,” u la bynrap.
