Shillong, K’Lyngkot 16
Ka Elite XI bad ka Power Grid ki la khur ïa ka jingjop ha ka 3rd Division Shillong Cricket League 2024 ha ka sngi Ba-ar ha madan Urkaliar, Shillong.
Ha kane ka jingïakhun ka Elite XI ka la pynliem noh ïa ka Laitkor CC da 8 run. Ka Laitkor kaba la jop ïa ka kynting pisa, ka la ailad shwa ïa ka Elite XI ba kan tied nyngkong ha kaba ka la kamai 157 run bad shah pynhap 9 wiket ha ki 20 over. U Arup Das u la tied 47 run na ki 38 bol bad u Jayanta Dey u la ïoh 26 run na ki 26 bol. Katba u Heipormi Lyngdoh u la khur 3 wiket bad ïa ki 2 wiket la khur da u Aleric Wanswet.
Haba wan beh ïa ka thong ka Laitkor ka la kamai tang 149 run bad shah pynhap 6 wiket ha ki 20 over. U Wanpher u la khyrwit ïa ka shiteng spah kaba 54 run na ki 56 bol bad u Syrpailang Kharkongor u la ïoh 29 run na ki 34 bol. Katba u Ravi Kumar u la khur 4 wiket bad ia ka shi wiket la khur da u Arup Das. Ïa ka nam Player of the Match la khur da u Ravi Kumar.
Haba phai sha kawei pat ka jingïakhun, ka Power Grid ka la jop da 88 run ïa ka Young Langsning. Ka Power Grid kaba la shimti ban tied nyngkong, ka la kamai 211 run bad shah pynhap 7 wiket ha ki 20 over. U Utpal Das u la khyrwit ïa ka shiteng spah kaba 54 run na ki 27 bol bad u Kumar Chettri u la ïoh 35 run na ki 24 bol. Katba u Gavin Nongkynrih ula khur 2 wiket bad ïa ka shi wiket la khur da ka Damechwa Khongsngi.
Haba wan shimti ïa ka pali kaba ar ka Young Langsning ka la kamai tang 123 run bad shah pynhah 9 wiket ha ki 20 over. U Syl Wanñiang u la tied 40 run na ki 38 bol bad u Alvin Marbaniang u la ïoh 19 run na ki 13 bol. Katba u Bala Satish u la khur 2 wiket bad ïa ka shi wiket la khur da u Kumar Chettri. Ïa ka nam Player of the Match la khur da u Utpal Das.
